पोखरा, — पोखरा महानगरपालिका र स्थानीय समुदायको सहकार्यमा लेकसाइडको पैदल मार्ग (फुट ट्र्याक) बाराही घाटदेखि फेवा घाटसम्म आज दोस्रो दिन निरन्तर सरसफाइ गरिएको छ । बिहान ८ बजे सुरु भएको अभियानमा स्थानीय फुटपाथ व्यापारी, पर्यटन व्यवसायी, युवा क्लब तथा स्वयंसेवक गरी करिब डेढ सय व्यक्तिको सक्रिय सहभागिता रह्यो । उनीहरूले विभिन्न ठाउँमा छरिएको प्लास्टिक, बोटबिरुवा काटिएकाका अवशेष र घर-बगैँचाबाट बगेर आएको फोहोर संकलन गरी व्यवस्थापन गरे ।
अभियानको नेतृत्व गरेका युवा समाजसेवी विकास पहारीका अनुसार बिहानको चरणमा एक ट्रक र दिउँसो २ बजे दोस्रो ट्रक गरी कुल दुई ट्रक फोहोर फेवा ताल किनारबाट बाहिरिएको छ । “परिवर्तन आफैँबाट सुरु गर्छौँ भने मात्र शहर सफा हुन्छ,” पहारीले भने, “सफाइ सम्पत्ति, स्वास्थ्य र प्रगतिको जग हो भन्ने सन्देश यो पहलले दिएको छ ।” उनका अनुसार आगामी साताको अन्त्यसम्म दैनिक रूपमा कम्तीमा एक ट्रक फोहोर संकलन गर्ने लक्ष्य लिइएको छ ।
