पोखरा, कास्की — पोखरा ३३ का सञ्जय आचार्य हाल युएईको आबुधाबी, अल रूईसमा सुरक्षा गार्डको रूपमा कार्यरत छन्। उनी २०२४ अप्रिल २१ देखि युएईमा काम गरिरहेका छन्।
सञ्जयका अनुसार, उनको राहदानीको म्याद दुई महिना अघि सकिएको थियो, तर कम्पनीले राहदानी नवीकरण गर्न अनुमति नदिँदा उनी नेपाल फर्किन असमर्थ बनेका छन्। यसबारे उनले युएईको लेबर कोर्टमा पनि उजुरी दर्ता गराइसकेका छन्, तर अहिलेसम्म कुनै ठोस समाधान पाएका छैनन्।
सञ्जयले भनेका छन् कि कम्पनीले उनलाई कामबाट पनि निकालिसकेको छ र करिब ३०–३५ दिनदेखि बसोबासको उचित व्यवस्थापन नभएको कोठामा बस्न बाध्य छन्। उनी “नेपाली कामदारहरूको हितमा तत्काल नेपाल फर्किन सहयोग मिल्ने वातावरण”को माग गर्दै आएका छन्।
यो विषयमा पोखरा महानगरपालिकाका प्रमुख धनराज आचार्य, प्रेस रजिस्ट्रार बिमला भण्डारी, कास्की आदर्श समाज युएई, विध्या भट्टराई लगायत विभिन्न नेपाली मिडियालाई समेत जानकारी गराइएको थियो।उनि नेपालमा रहदा पत्रकार भएर काम गर्थे तर अहिलेसम्म कुनै सहारा नपाएपछि सञ्जय विदेशमै तडपिएर बसेको गुनासो गर्दै आएका छन्।
विशेषज्ञहरूका अनुसार, यस्ता समस्यामा परेका कामदारलाई तत्काल दूतावाससँग सम्पर्क गर्न, लेबर कोर्टमा उजुरी दर्ता गर्न र समाजिक संगठनहरूसँग समन्वय गर्न आवश्यक हुन्छ।
सञ्जयको घटनाले विदेशमा कार्यरत नेपाली कामदारहरूलाई राहदानी र रोजगारीको सुरक्षा सम्बन्धमा सचेत रहनुपर्ने आवश्यकता दोहोर्याएको छ।
