अमेरिकाका लागि प्रस्तावित राजदूत चिरनजंग थापाको संसदीय सुनुवाइ प्रक्रियामा सांसदहरूले उनको कार्ययोजना, कूटनीतिक प्राथमिकता र डायस्पोराप्रतिको दृष्टिकोणमाथि गम्भीर प्रश्न उठाएका छन्।
सोमबार बसेको संसदीय सुनुवाइ समितिको बैठकमा सांसदहरूले प्रस्तावित राजदूतको अनुभवको प्रशंसा गर्दै अमेरिका जस्तो विश्व शक्तिको सामना गर्दा नेपालको असंलग्न परराष्ट्र नीति र राष्ट्रिय हितमा स्पष्टता हुनुपर्नेमा जोड दिएका हुन्
बैठकमा नेकपा एमालेकी सांसद पद्मा अर्याल र नेपाल कम्युनिस्ट पार्टीका सांसद वर्षमान पुनले प्रस्तावित राजदूत थापाको कार्ययोजनाका विभिन्न विषयमा स्पष्टीकरण माग गरे।
सांसद अर्यालले अमेरिकामा रहेका नेपाली डायस्पोराले भोग्दै आएका दूतावाससम्बन्धी समस्या, उनीहरूको सेवा–सुविधा र सांस्कृतिक अपनत्वका विषयमा ठोस योजना प्रस्तुत गर्न आग्रह गरिन् । राजदूतको कार्यकालमा नेपालले प्राप्त गर्ने ठोस नतिजा र एकवर्षीय कार्ययोजनाको खाका स्पष्ट नभएको भन्दै उनले जिज्ञासा राखिन्।
सांसद वर्षमान पुनले प्रस्तावित राजदूत थापाको उच्च शैक्षिक र व्यावसायिक पृष्ठभूमिको प्रशंसा गरे पनि कार्ययोजनामा उल्लिखित कतिपय विषयमा असहमति जनाए। थापाले कार्ययोजनामा राखेको ‘अमेरिकी सैन्य शक्तिबाट लाभ लिने’ र ‘सैन्य तथा सुरक्षा सहयोग सुदृढ गर्ने’ प्रस्तावमाथि पुनले आपत्ति जनाएका हुन् । नेपालको संविधान र असंलग्न परराष्ट्र नीतिअनुसार सैन्य सहयोग प्राथमिकतामा पर्नुपर्ने हो वा होइन भन्ने विषयमा उनले प्रश्न गरे।
त्यसैगरी दूतावासका कर्मचारी र तिनका परिवारले अमेरिकी रीतिरिवाज पूर्ण रूपमा पालना गर्ने भनी कार्ययोजनामा उल्लेख गरिएको विषय व्यावहारिक नभएको भन्दै पुनले यसमा स्पष्ट हुन आग्रह गरे । अमेरिका नेपालका लागि आर्थिक सहायता र लगानी भित्र्याउने दृष्टिकोणले महत्त्वपूर्ण भएकाले सोहीअनुसार कूटनीतिक सक्रियता बढाउन उनले सुझाव दिए।
