नेपाली कम्युनिस्ट पार्टी(नेकपा)ले विभिन्न ५ वटा निर्णय गरेको छ। शुक्रबार पार्टी केन्द्रीय कार्यालय पेरिसडाँडामा बसेको केन्द्रीय कार्य संयोजन समितिको छैटौँ बैठकले कात्तिक र मंसिर महिनामा “राष्ट्रिय जागरण अभियान” सञ्चालन गर्ने निर्णय गरेको छ।
अभियानको उद्घाटन कार्तिक ७ गते बृहत् पत्रकार सम्मेलनसहित पार्टी केन्द्रीय कार्यालय पेरिसडाँडामा गरिनेछ, र उक्त अभियान मंसिर २५ गते सम्पन्न हुने प्रवक्ता प्रकाश ज्वालाले बताए । अभियानमा केन्द्रदेखि स्थानीय समितिसम्मको सिङ्गो पार्टीपङ्क्ति परिचालित हुनेछ । बैठकले अभियान सञ्चालन कार्यविधि तथा कार्ययोजना पारित गरेको छ ।
- पार्टी केन्द्रीय समिति, केन्द्रीय कार्य समिति र केन्द्रीय सचिवालयका बैठकहरू अभियान सम्पन्न पश्चात मंसिर महिनाको अन्तिम साता आयोजना गरिनेछ ।
- आगामी पौष ११ गते देशभरिका सम्पूर्ण वडाहरूमा एकै दिन पार्टीका वडा अधिवेशनहरू आयोजना गरिनेछ र माघ १५ गते देशभरिका सम्पूर्ण पालिकाहरू (महानगर, उपमहानगर, नगरपालिका र गाउँपालिका) मा एकै दिन पार्टीका पालिका अधिवेशनहरू आयोजना गरिनेछ ।
- बैठकले बडादसैँ, तिहार, छठ, नेपाल संवत् लगायतका चाडपर्वहरूको अवसरमा स्वदेश तथा प्रवासमा रहनुभएका सम्पूर्ण नेपाली नागरिकमा शुभकामना व्यक्त गरेको छ ।
- बैठकले पार्टीका केन्द्रीय अनुशासन आयोगका सचिव क. अशोक रोकाय ‘सङ्कल्प’, अनुशासन आयोगका सदस्य विजयबाबु बनबासी तथा केन्द्रीय सल्लाहकार परिषद्का सदस्यहरू क. पूर्णबहादुर गुरुङ र बौएलाल महतोको दुःखद निधन भएकोमा उहाँहरूप्रति भावपूर्ण श्रद्धाञ्जली व्यक्त गर्दै शोकसन्तप्त परिवारजनमा समवेदना प्रकट गर्ने शोक प्रस्ताव पारित गरेको छ ।
