कमन जेनजी नेपालका अध्यक्ष विकेश साहले प्रधानमन्त्री वालेन्द्र शाह (बालेन)ले नेपालले पनि भारतको सिमाना मिचेको छ भन्नु सार्वभौमसत्ताप्रतिको गम्भीर उल्लंघन र अपमान भएको टिप्पणी गरेका छन् ।
आइतबार बसेको प्रतिनिधिसभा बैठकमा प्रधानमन्त्रीले यस्तो अभिव्यक्ति दिएपछि त्यसलाई फिर्ता लिन र संसद्को रेकर्डबाट हटाउनसमेत जेनजी अगुवा साहले माग गरेका छन् । प्रधानमन्त्रीले दिएको राष्ट्रघाती अभिव्यक्ति तत्काल फिर्ता लिनुपर्ने मागसमेत उनले गरेका छन् ।
भारतले नेपालको जग्गा मात्र होइन, नेपालले पनि भारतको जग्गा धेरै ठाउँमा मिचेको रहेछ’ प्रधानमन्त्री शाहले यस्तो अभिव्यक्ति दिएपछि कमन जेनजी नेपालका अध्यक्ष साहले ‘कसलाई खुशी पार्नका लागि बोल्नु भो’ भन्दै प्रश्न गरेका छन् ।
‘भारतको कुन ठाउँको जग्गा, कति र कहिले मिचेको हो ? तथ्य सार्वजनिक गर्नुस् । हामी जान्न चाहन्छौँ । तपाईंले मनपरी बोलन मिल्दैन, राष्ट्रिय अखण्डता जस्तो गम्भीर विषयमा जे पनि बोल्नु आपत्तिजनक छ । तपाईंले यो कसलाई खुशी पार्न बोल्नुभो ? यो नेपालको हितमा त पक्कै छैन । म विशेष आग्रह गर्न चाहन्छु, प्रधानमन्त्रीज्यू यो भनाइ फिर्ता लिनुस् र संसद्को रेकर्डबाट हटाउनुस्,’ कमन जेनजी नेपालका अध्यक्ष साहले भनेका छन् ।
