कर्णाली प्रदेश सरकारले वीरेन्द्रनगरमा सन्तान पढाउन अस्थायी बसोबास गरिरहेका आमाहरूका अटो ड्राइभिङ तालिम दिएको छ । सीप विकास तालिम अन्तर्गत उनीहरूलाई ३० दिने तालिम दिइएको हो ।
तालिममा कर्णालीका विभिन्न स्थानका ५० जना आमाहरू सहभागी थिए, जो वीरेन्द्रनगर सहरमा आफ्ना छोराछोरीलाई अध्ययन गराउन बसिरहेका थिए।
तालिमको समापन सत्रमा सहभागी सामाजिक विकासमन्त्री घनश्याम भण्डारीले महिलाहरूको लागि सामाजिक सशक्तीकरण र आत्मनिर्भर बन्नका लागि सीपयुक्त तालिमको व्यवस्था गरिएको बताए।
’सीपलाई व्यावसायिक रूपमा कार्यान्वयन गर्न सुझाव दिन्छु, ‘ उनले भने, ‘आत्मनिर्भरको लागि आफैँले केही न केही स्वरोजगारमूलक कार्यमा लाग्नु आवश्यक हुनुभएकाले यस्ता कामहरूमा सरकारले सदैव सहयोग गर्ने छ ।’
यसअघि अचार बनाउने, चुरा पोते बनाउने, केक बनाउने, च्याउ उत्पादन, सिलाई कटाई तालिम समेत सञ्चालन गरिसकिएको पनि भण्डारीले बताए।
यसअघि वीरेन्द्रनगर नगरपालिकाले पनि यस्तै कार्यक्रम चलाएको थियो। अहिले वीरेन्द्रनगरमा दुई दर्जन धेरै महिलाहरू अटो सञ्चालन गरेर जीविकोपार्जन गरिरहेका छन्।
