जेनजीको आन्दोलनका क्रममा क्षति पुगेका अस्पताल, प्रहरी चौकी, सरकारी कार्यालय लगायतका अत्यावश्यक सेवाका भवन पुनर्निर्माण गर्ने उद्देश्यसहित घर निर्माण फाउण्डेशनले विशेष अभियान सुरु गर्ने घोषणा गरेको छ।
फाउण्डेशनले स्कील सेवा प्रालिसँग सहकार्यमा सुरु गर्न लागेको यो अभियानलाई निर्देशक सताक्षी मिश्र, महेश तिमिल्सिना र प्रशान्त प्रधानको नेतृत्वमा अघि बढाइनेछ। उनीहरूले यो अभियानलाई केवल मर्मतको काम नभई राष्ट्र पुनर्निर्माणको साझा अभियान भएको बताएका छन्।
फाउण्डेशनका निर्देशकहरूको भनाइअनुसार, तत्कालीन प्राथमिकतामा अस्पताल, प्रहरी चौकी, सरकारी कार्यालय र एनजीओका भवनहरूलाई यथाशीघ्र सञ्चालनमा ल्याइनेछ। यसका लागि आवश्यक सम्पूर्ण सीप र दक्ष जनशक्ति परिचालन गरिनेछ।
सताक्षी मिश्रले भनिन्, “यी भवनहरू केवल इटा र सिमेन्टका संरचना मात्र होइनन्, यी त जनताको आशा, विश्वास र सेवाका प्रतीक हुन्। तिनको पुनःनिर्माण हाम्रो कर्तव्य हो।”
फाउण्डेशनले विद्युतीय मर्मत, प्लम्बिङ, सुरक्षा प्रणाली, ढोका–झ्याल, फर्निचरदेखि सम्पूर्ण संरचनागत नवीकरणसम्मका काम तत्काल सुरु गर्ने तयारी गरेको छ। साथै, हालै क्षतिग्रस्त भएका भवनका सम्बन्धित निकायलाई आफ्नो आवश्यकताबारे जानकारी दिन आग्रह गरिएको छ।
“देशलाई अहिले चाहिएको छ छिटो समाधान। हामीसँग छ अनुभव र जनशक्ति—अब समय हो राष्ट्रका लागि काम गर्ने,” निर्देशकहरूले संयुक्त वक्तव्यमा उल्लेख गरेका छन्।
यस अभियानमार्फत आन्दोलनले क्षति पुर्याएका संरचनाहरू पुनः सञ्चालनमा आएपछि जनताको स्वास्थ्य, सुरक्षा र प्रशासनिक सेवामा सहजता आउने विश्वास फाउण्डेशनले लिएको छ।
