नेकपा (एस) पोखरा महानगर कमिटीका नेता प्रेम थापाले देश अहिले थप परिवर्तनका नाममा आन्दोलन सहन नसक्ने बताएका छन्। उनले दलका नेताहरूसँग वार्तामार्फत सहमति गरेर अघि बढ्न आग्रह गरेका हुन्।
थापाले जेनलाई सम्बोधन गर्दै पठाएको सन्देशमा पार्टी कार्यकर्तालाई झोले मात्र नदेख्न आग्रह गर्दै, धेरै कार्यकर्ता देश बनाउने सपना बोकेर, नेताहरूको तानाशाही प्रवृत्तिको विरोधमा पनि सक्रिय रहेको उल्लेख गरेका छन्।
उनले भने, “राजनीतिक कौशल र फराकिलो सोच भएका दलका कार्यकर्तालाई पनि समेटेर वार्तामा बसेर निर्णय लिनु भनेको देश र जनताको भलो गर्नु हो।”
राजनीतिक नेतृत्वप्रति कटाक्ष गर्दै उनले पहिलो पुस्ताले ल्याएका उपलब्धिलाई ‘हाम्रो मात्र अधिकार’ भन्ने सोचले आजको अवस्था ल्याएको उल्लेख गरे। थापाले थपे, “त्यसको फलस्वरूप सजाय भोग्नु परेको छ। अब पालो तपाईंहरूको हो।”
उनले जेनलगायत नेताहरुलाई सुझबुझका साथ देश र जनताको हितमा सोच्नुपर्नेमा जोड दिएका छन्। “मेरो कुरा मान्नैपर्छ भन्ने छैन, तर विचार गर्नुहोस्—देश र जनताको हितमा सोच्नु आजको आवश्यकता हो,” थापाले भने।
