पार्दी बैदाम परोपकार समितिले शनिबार फेवाताल किनार सरसफाइ कार्यक्रम सम्पन्न गरेको छ। खहरेघाटदेखि गहिरा चौतारा क्षेत्रसम्म सञ्चालन गरिएको उक्त कार्यक्रममा वडा अध्यक्ष, वडा प्रहरी कार्यालय बैदाम, नागरिक समाज कास्की, पर्यटनसँग आवद्ध विभिन्न संघसंस्था, आमा समूह, जलारी समुदाय तथा स्थानीय नागरिकहरूको उल्लेखनीय उपस्थिति रहेको थियो।
कार्यक्रम समितिका अध्यक्ष मेहरमान श्रेष्ठको अध्यक्षतामा सम्पन्न भएको हो। सरसफाइ अभियानमा सहभागी बिकास पाहारीले फेवाताल र त्यसको किनार सफा राख्न सबैलाई आह्वान गरेका थिए।
पार्दी बैदाम परोपकार समितिले विगतमा पोखरामा सामाजिक कार्यको क्षेत्रमा महत्वपूर्ण योगदान पुर्याएको छ। तत्कालीन नगर पञ्चायतको समयमा समितिले आफ्नै खर्चमा सवारीसाधन किनेर निजी स्तरबाटै फोहोरमैला संकलन कार्य सुरु गरेको थियो। यसलाई पोखरामा आधुनिक फोहोर व्यवस्थापनको प्रारम्भिक अभ्यासका रूपमा लिने गरिन्छ।
समितिले पार्दीदेखि बैदामसम्म फोहोरमैला संकलन गर्ने अभियान समेत सञ्चालन गरेको थियो। लामो अन्तरालपछि पुनः देखाएको यस संस्थाको सक्रियतालाई सहभागीहरूले सराहनीय कदमका रूपमा लिएका छन्।
सामाजिक र ऐतिहासिक पृष्ठभूमि बोकेको समितिको यसपटकको सरसफाइ अभियानले ताल संरक्षणसँगै सामुदायिक एकता र पर्यटन प्रवर्द्धनमा पनि योगदान पुर्याउने अपेक्षा गरिएको छ।
