मैत्रिपुर्ण भलिवल खेलमा पोखरा महानगरपालिकाका मेयर धनराज आचार्यको टोली विजयी हुनु भएको छ । पोखराको क्याम्पिङ चौरको भलिवल कोर्टमा विहिबार भएको खेलमा महानायक राजेश हमालको टोलीलाई २—१ को सेटमा पराजित गर्दै मेयर आचार्यको टोली विजयी भएको हो ।
पहिलो सेटमा पाजित भएको पोखराको टोलीले दोश्रो सेटमा सम्हालिदै तेश्रो सेटमा सहज जित हासिल गरेको हो । महानायक हमालको खेल हेर्न तथा कलाकारसँग सेल्फी खिच्ने दर्शकको केही समय भिडभाड भएको थियो । खेलकुदको शहर पोखरामा शुक्रबारदेखि दोस्रो एभरेस्ट महिला भलिबल लिग सुरु हुने भएकोले त्यसको पूर्व सन्ध्यामा उक्त मैत्रिपूर्ण खेल आयोजना गरिएको पोखराका मेयर धनराज आचार्यले बताउनु भयो । कास्कीका प्रमुख जिल्ला अधिकारी रुद्रादेवि शर्मा, महानगरका प्रमुख प्रशासकिय अधिकृत भुक्तिराम अर्याल लगायतका मैदानमा उत्र्रिनु भएको थियो ।
पोखरा रंगशालाको बहुउद्देश्यीय कभर्ड हलमा भदौं २० देखि २८ गतेसम्म ९ दिन उक्त प्रतियोगिता संचालन हुने भएको हो । शुक्रबार पहिलो खेल कर्णाली यशविस र पोखरा निन्जाज बीच हुने भएको छ भने दोस्रो खेल ललितपुर क्वीन्स र मधेश युनाइटेड बीच हुने आयोजकका अपरेसन हेड मनोज वैद्यले बताउनु भयो । यस्तै, लिगमा भाग लिने ६ वटै फ्रेन्चाइज टिमका कप्तानहरु उषा भण्डारी, सलिना श्रेष्ठ, अरुणा शाही, प्रगति नाथ, सुमित्रा रेग्मी र निरुता ठगुन्ना पनि केही समय भलिबल कोर्ट उत्रिनु भएको थियो ।
साविक विजेता कर्णाली प्रदेश सहित ललितपुर क्विन्स, मधेश युनाइटेड, काठमाडौं स्पाइकर्स, लुम्बिनी लाभाज र पोखरा निन्जाजले सहभागिता जनाएका छन् । लिगमा उषा भण्डारीले काठमाडौं स्पाइकर्स, सलिनाले ललितपुर क्विन्स, अरुणाले लुम्बिनी लाभाज, सुमित्राले कर्णाली यशविस र निरुताले मधेश युनाइटेडको प्रतिनिधित्व गर्नु भएको छ । चलिगका लागि सहभागी ६ फ्रेन्चाइज टिमहरु पोखरा आइसकेका छन् । यस्तै, थाइल्याण्ड, नेदरल्याण्ड्स, रुसदेखि ब्राजिलसम्मका खेलाडीहरु पनि आइसक्नु भएको छ ।
