पोखरा १७, भदौ,खेलकुदको शहर पोखरामा दोस्रो संस्करणका नेपाल खुला स्नूकर प्रतियोगिता–२०८२ सुरु भएको छ । पोखरा ड्यामसाइडमा रहेको फाइनल स्कोर स्पोट्र्स बार प्रा.लि.को आयोजनामा र कास्की बिलियार्ड स्नूकर तथा पुल संघको विशेष सहयोगमा पुनः दोश्रो पटक उक्त प्रतियोगिता पोखरामा मंगलबार देखि सुरु भएको हो ।
पोखरा–१७ ड्यामसाइडस्थित फाइनल स्कोर स्पोट्र्स बारमा यही भदौं २८ गतेसम्म सञ्चालन हुने प्रतियोगिताको उद्घाटन पोखरा महानगरपालिकाका मेयर धनराज आचार्यले गर्नुभयो । कार्यक्रममा बोल्दै उहाँले स्नुकर खेल खेल्ने खेलाडीहरु समाजमा हेर्ने दृष्टिकोणमा सकरात्मक परिवर्तन गर्नुपर्ने बताउनु भयो । मेयर आचार्यले स्नुकर खेल इण्डोर हल भित्र खेलिने निकै शान्त ढंगले शारीरिक तथा मानसिक रुपमै खेलिने तर अन्य खेल भन्दा केही महङगो भने हुने गरेको भनाई राख्नु भयो ।
प्रतियोगितालाई निरन्तरता दिन आग्रह गर्दै यस बर्ष देखि महानगर प्रबद्र्धकका रुपमा रहेको मेयर आचार्यले जनाउनु भयो । पर्यटनको राजधानि पोखरामा हरेक दिन जसो विभिन्न खेलकुद प्रतियोगिता जारी रहेको उहाँले उल्लेख गर्नुभयो । पोखरा १७ का वडा अध्यक्ष राधिका शाही योगीले उक्त प्रतियोगिताले पोखराको खेल पर्यटन प्रबद्र्धनमा टेवा पुग्ने विश्वास व्यक्त गर्नुभयो । बक्सिङका पदकधारी खेलाडी एवं अग्रज पर्यटन व्यवसायी गणेश बहादुर भट्टराईले पोखरा क्षेत्रमा हुने खेलकुदका गतिविधिलाई पोखरा महानगरले आवश्यक सहयोग गर्न सुझाव दिनुभयो । कुनै पनि देशमा खेलकुदका गतिविधि हुनुले खेलाडी उत्पादन र खेलुकदको विकाससंगै देशको आर्थिक पक्ष राम्रो भएको सन्देस प्रवाह हुने उहाँको तर्क थियो ।
नेपाल विलिडियार्ड स्नुकर तथा पुल संघका अध्यक्ष सरोज कुमार मुल्मीले उक्त प्रतियोगिताले खेलाडी उत्पादनमा टेवा पुग्ने बताउदै दशौं राष्ट्रिय खेलकुदमा यस खेललाई समावेस गर्न पहल गरेको उल्लेख गर्नुभयो । नेपालले यस खेलबाट पदकको राम्रो सम्भावना भएको उहाँको भनाई थियो ।
प्रतियोगितामा देशभरबाट १ सय ३६ जना खेलाडीको सहभागि भएको संस्थाका अध्यक्ष सोम बि.क.ले बताउनु भयो । प्रतियोगिताका विजेताले नगद २ लाख २ हजार २ सय २ रुपैया सहित ट्रफी, मेडल र प्रमाणपत्र प्रदान गरिने भएको छ । प्रतियोगितामा दोश्रो हुनेलाई ८० हजार प्रदान गरिने भएको छ भने सेमिफाइनलमा प्रवेश गर्ने दुई खेलाडीलाई जनही २५ हजार प्रदान गरिने भएको छ । प्रतियोगितामा हाइएस्ट ब्रेकरलाई २० हजार र प्रत्येक खेलमा सेन्चुरी ब्रेक गर्ने खेलाडीलाई ७ हजार ५ सय रुपैया प्रदान गरिने भएको छ । प्रतियोगितामा पुरस्कार राशी ३ लाख ५९ हजार ७ सय २ रहेको आयोजकले जनाएको छ ।
यस अघि २०८० सालमा पहिलो संस्करण भव्यतापूर्वक सम्पन्न भएपश्चात दोश्रो संस्करण पोखरामा भएको हो । गत संस्करणका विजेता इटहरीका आयुष गौतम हुनुहुन्थ्यो । प्रतियोगिता सम्पन्न गर्न करिब १२ लाख रुपैयाँ खर्च हुने अध्यक्ष बि.क.ले जनाउनु भयो ।
प्रतियोगिताले पोखरा क्षेत्रको स्नूकर खेलको स्तरवृद्धि, पर्यटन प्रवद्र्धन र खेलकुद संस्कृतिको विकासमा योगदान पुग्ने फाइनल स्कोर स्पोट्र्स बार प्रा.लि.का अध्यक्ष सोम बि.क.ले विश्वास व्यक्त गर्नुभयो । साथै, पोखरालाई खेलकुद र पर्यटनको शहरको रुपमा स्थापित गर्न पनि यसले सहयोग गर्ने उहाँको भनाइ थियो । प्रालिका सञ्चालक प्रताप गुरुङले पनि यस प्रतियोगिताले पोखराको खेल पर्यटन प्रवद्र्धनमा महत्वपूर्ण टेवा पुग्ने विश्वास व्यक्त गर्नुभयो । उक्त प्रतियोगितालाई पोखरा महानगरले प्रबद्र्धन गरेको छ । भोलि बिहान बाट पहिलो चरणका खेलहरु जारी रहने आयोजकले जनाएको छ ।