भुटान एयरलाइन्सले भुटानको पारो अन्तर्राष्ट्रिय विमानस्थलबाट पोखरा अन्तर्राष्ट्रिय विमानस्थलमा सीधा चार्टर उडान सुरु गर्ने घोषणा गरेको छ। यो महत्त्वपूर्ण कदमले दुई देशबीचको पर्यटन प्रवर्द्धनमा नयाँ आयाम थप्नेछ भने पोखरा महानगरपालिकाले यसका लागि सधैं सहयोगी भूमिका निर्वाह गर्ने प्रतिबद्धता जनाएको छ।
हाल भुटान एयरलाइन्सले भुटानबाट त्रिभुवन अन्तर्राष्ट्रिय विमानस्थलमा सातामा चार वटा उडान गर्दै आएको छ। तर, पोखरामा सीधा उडानको थालनीले पर्यटकहरूका लागि पोखराको पहुँच अझ सहज र आकर्षक बनाउने अपेक्षा गरिएको छ।
पोखरा महानगरपालिकाका मेयर धनराज आचार्यले पोखरादेखि भुटान र भुटानदेखि पोखराको सीधा उडानले दुवै देशको पर्यटन प्रवर्द्धनमा अतुलनीय सहयोग पुग्ने बताउनुभयो। उहाँले पोखरालाई अन्तर्राष्ट्रिय बजारसम्म जोड्न यसले महत्त्वपूर्ण योगदान गर्ने भन्दै यसको निरन्तरताका लागि विशेष पहल गर्न पर्यटन व्यवसायीहरूलाई समेत आग्रह गर्नुभयो। मेयर आचार्यले भन्नुभयो, “पोखरालाई अन्तर्राष्ट्रिय बजारसँग जोड्ने यो महत्वपूर्ण कदम हो। महानगरपालिकाको तर्फबाट यसका लागि सधैं सहयोग रहनेछ र यसलाई सफल बनाउन हामी निरन्तर सक्रिय रहनेछौं।”
यसअघि गत असार ७ गते चीनको छेन्दु विमानस्थलबाट सिचुवान एयरलाइन्सको न्यारोबडी एयरबस ३१९ जहाजले पोखरामा चार्टर उडान गरेको थियो। पोखराबाटै छेन्दुमा हिमालयन एयरलाइन्सले पनि उडान भरिरहेको छ। पछिल्लो पटक सिचुवान एयरलाइन्सले पोखरा–सिचुवान–अस्ट्रेलिया उडानको पहल गरिरहेको छ।
भुटानसँगको सीधा हवाई सम्पर्कले पोखराको पर्यटन क्षेत्रमा नयाँ उत्साह थपेको छ, जसले गर्दा पोखरालाई अन्तर्राष्ट्रिय गन्तव्यको रूपमा स्थापित गर्न थप मद्दत पुग्ने विश्वास गरिएको छ। महानगरको सक्रिय सहयोगले यस उडानलाई दिगो बनाउन र पोखराको पर्यटकीय आकर्षण बढाउन महत्वपूर्ण योगदान पुग्ने देखिन्छ।
