पोखरा, : पोखरालाई नेपालको पर्यटन राजधानी घोषणा गरिएसँगै यसको दिगो सहरी यातायात व्यवस्थापनका लागि महत्वपूर्ण कदम चालिएको छ। एसियाली विकास बैंक (ADB) र ग्रीन क्लाइमेट फन्डको साझेदारीमा पोखरामा ४० मिलियन अमेरिकी डलर बराबरको ‘इमोविलिटी परियोजना’ सञ्चालन हुने भएको छ। पोखरा महानगरपालिकाका मेयर धनराज आचार्यले यस परियोजनाले पोखराको सार्वजनिक यातायातलाई व्यवस्थित बनाउनुका साथै वातावरण तथा पर्यावरणको संरक्षणमा महत्वपूर्ण योगदान पुर्याउने विश्वास व्यक्त गर्नुभएको छ।
हालै गण्डकी प्रदेश सरकार, नीति योजना आयोग, विकास साझेदारहरू, यातायात व्यवसायी लगायत सरोकारवालाहरूको सहभागितामा आयोजित एक कार्यशालामा पोखराको सार्वजनिक यातायात सुधारका लागि विद्युतीय सवारीसाधनमा जोड दिने, चार्जिङ स्टेशनहरू निर्माण गर्ने, सार्वजनिक यातायात सेवा सम्बन्धी डिजिटल जानकारी उपलब्ध गराउने र व्यवस्थित बस स्टपहरूको पूर्वाधार तयार गर्ने लगायतका विषयमा गहन छलफल भएको छ।
मेयर आचार्यले परियोजना सञ्चालनका लागि आवश्यक समन्वय तथा स्थानीय व्यवस्थापनको कार्य पोखरा महानगरपालिकाले गर्ने बताउनुभयो। उहाँले यातायात व्यवसायीहरूलाई सेवाको गुणस्तर सुधार गर्न र जनस्वास्थ्य तथा पर्यावरणप्रति सचेत बन्न आग्रह गर्नुभएको छ।
यसअघि मेयर आचार्यले मनिला भ्रमणका क्रममा एडीबीको मुख्यालय पुगेर पोखरामा इमोविलिटी परियोजना सञ्चालनका विषयमा छलफल गर्नुभएको थियो। एडीबीले पोखराको यातायात व्यवस्थापनलाई प्राथमिकतामा राखेको छ।
गण्डकी प्रदेश सरकारले पोखरा लगायत समग्र गण्डकी प्रदेशको सार्वजनिक यातायात व्यवस्थापन गर्ने गरी प्राधिकरण गठनका लागि कानुनी संरचना निर्माण गरिरहेको जनाएको छ। एडीबीका वरिष्ठ सार्वजनिक व्यवस्थापन विशेषज्ञ अरुण रामामुर्ति नेतृत्वको प्रतिनिधिमण्डल यस परियोजनाका विषयमा भइरहेको छलफलमा सहभागी भएको छ।
यस परियोजनाले पोखराको शहरी विकासमा नयाँ आयाम थप्ने र वातावरणमैत्री यातायात प्रणालीको विकासमा महत्वपूर्ण भूमिका खेल्ने अपेक्षा गरिएको छ।
