पोखरा, – नेपाल कम्युनिष्ट पार्टी (एकीकृत समाजवादी) पोखरा महानगरपालिकाको पहिलो अधिवेशन जेष्ठ १५ गते हुने भएको छ। संगठन निर्माण, वैचारिक सुदृढीकरण र नेतृत्व रूपान्तरणका दृष्टिले यो अधिवेशन निर्णायक बन्ने अपेक्षा गरिएको छ। विशेषगरी पार्टीले नयाँ पुस्ताको सहभागिता र नेतृत्व विकासमा दिएको जोडका कारण यो अधिवेशनले युवाप्रति पार्टीको दृष्टिकोण पनि प्रस्ट पार्नेछ।
नेकपा एस पोखरा महानगर कमिटीले मंगलबार पत्रकार सम्मेलन गरी अधिवेशनको तयारी र उद्देश्य सार्वजनिक गरेको हो। कमिटीका अध्यक्ष प्रेम थापाका अनुसार अधिवेशनलाई महासचिव घनश्याम भुषालले सम्बोधन गर्ने कार्यक्रम तय गरिएको छ।
‘यो केवल अधिवेशन होइन, नयाँ पुस्तालाई अग्रपंक्तिमा ल्याउने अवसर पनि हो,’ थापाले भने। ‘हामी संगठनलाई जीवित, विचारलाई स्पष्ट र नेतृत्वलाई समावेशी बनाउन चाहन्छौं।’
उनका अनुसार अधिवेशनमा पोखराका ३३ वटै वडाबाट ५/५ जनाका दरले १६५ प्रतिनिधि सहभागी हुनेछन् भने आयोजक कमिटीका ८० सदस्यसहित कुल २४५ प्रतिनिधिको उपस्थिति रहनेछ।
पछिल्लो समय नेकपा एसले युवालाई संगठनको मूलधारमा ल्याउने नीति लिएको देखिन्छ। देशभर पार्टीमा युवाको आकर्षण बढिरहेको बेला पोखराको अधिवेशनले त्यसलाई संस्थागत गर्न सक्ने संकेत मिलेको छ। भुषालको सम्बोधनले युवाहरूको भविष्य, पार्टीको वैचारिक धार र संगठनात्मक नवीकरणका विषयमा सन्देश दिने अपेक्षा गरिएको छ।
विशेषगरी पोखराको जस्तो विविध सामाजिक संरचना भएको क्षेत्रमा युवा नेतृत्वको अभ्यासले स्थानीय राजनीति र पार्टीको संगठनात्मक गतिशीलतामा नयाँ ऊर्जा थप्ने विश्वास गरिएको छ।
अधिवेशनबाट पोखरा महानगरको नयाँ नेतृत्व चयन गरिनेछ। सम्भावना छ, नयाँ पुस्ताका प्रतिनिधि अग्रपंक्तिमा आउनेछन्। पार्टीको आन्तरिक लोकतन्त्र, युवा सहभागिता र वैचारिक स्पष्टताको परीक्षण हुने यो अधिवेशनले नेकपा एसको रणनीतिक सोचलाई पनि जनतामाझ ल्याउनेछ।
