पोर्चुगलमा कार्यरत नेपाली सेफ टङ्क सापकोटाले रसुवाको भोटेकोसीमा आएको भीषण बाढीबाट प्रभावित नागरिकको उद्धार तथा राहतका लागि ५१ लाख रुपैयाँ प्रदान गरेका छन् ।
सापकोटाले प्रधानमन्त्री दैवी प्रकोप उद्धार कोषमा उक्त जम्मा गरेको पोर्चुगलका लागि नेपाली राजदूत प्रकाशमणि पौडेलले जानकारी गराए । राजदूत पौडेलले प्राकृतिक विपत्तिमा परेका नागरिकको राहत तथा उद्धारका लागि सापकोटाले गरेको सहयोग प्रशंसनीय र प्रेरणादायी रहेको बताए ।
दाजु लक्ष्मीप्रसाद सापकोटा र श्रीमती सीता सापकोटासँग सल्लाह गरेर परिवारको तर्फबाट विपत्तिमा परेका नागरिकलाई सहयोग गरेको सापकोटाले जानकारी गराए ।
विगत ३० वर्षदेखि सपरिवार पोर्चुगलमा बस्दै आएका बागलुङ, दमेकका सापकोटाले राजधानी लिस्बनमा तीन इटालियन र एक नेपाली गरी चार वटा रेस्टुरेन्ट सञ्चालन गर्दै आएका छन्।
यसअघि कोरोना महामारीका समयमा पनि उनले राजधानी लिस्बनका करिब १० हजार जनालाई निःशुल्क खाना खुवाएका थिए ।
