बाराको निजगढ नगरपालिका–९ बुद्धचोकस्थित गुरुङ होटलमा बस्न जाँदा शङ्कास्पद मृत्यु भएकी युवतीको शव पोस्टमार्टमका लागि काठमाडौँ पठाइएको छ ।
वैशाख २५ मा निजगढ–१२ बस्ने २५ वर्षीया सीता थिङ होटलभित्र घाइते अवस्थामा रहेको जानकारी पाएपछि प्रहरीले उनलाई नजिकैको सामुदायिक अस्पताल प्रसूति गृहमा पठाएको थियो । अस्पतालका चिकित्सकले उनलाई मृत घोषणा गरेका थिए ।
उनको शव पोस्टमार्टमका लागि काठमाडौँ स्थित त्रिवि शिक्षण अस्पतालमा पठाइएको बाराका एसपी नरेन्द्र कुँवरले बताए । उनले भने, ‘शव शिक्षण अस्पताल पठाएका छौं, पोस्टमार्टम रिपोर्ट आएको छैन ।’
मृतक थिङसँगै १८ वर्षीया अनु सुनार, जितपुर सिमरा उपमहानगरपालिका–१६ टाङ्गिया बस्तीमा बस्ने ३५ वर्षीय महेश माझी र ३६ वर्षीय सुनिल बोम्जन होटलमा सँगै गएका थिए । महेश माझी र सीता थिङ एउटा कोठामा बसेका थिए । प्रहरीले मृतकसँगै गएका ३ जनालाई पक्राउ गरेको छ ।
पक्राउ परेकाहरू विरुद्ध इलाका प्रहरी कार्यालय निजगढले ज्यान सम्बन्धी कसुरमा म्याद लिएर अनुसन्धान गरिरहेको छ । मृतकसँगै बसेका माझीले शौचालयमा गएर थिङ झुण्डिएपछि उद्धार गरेको जिकिर गरेका छन् । मृतकको घाँटीमा मार्क देखिएको छ । अर्को कोठामा बसेका अनु सुनार र सुनिल बोम्जनले पनि झुन्डिएको अवस्थामा आफूहरूले उद्धार गरेको प्रहरीलाई बताएका छन् ।
माझीको दाहिने गालामा चोट देखिएको हुनाले झगडा हुँदा हत्या गरेको हुनसक्ने आशंका गरिएको छ । बाराका एसपी कुँवर भन्छन्, ‘हत्याको मनसाय थियो कि थिएन भन्नेबारे अनुसन्धान गर्दै छौं ।’
आरोपी मध्येका बोम्जनलाई प्रहरीले घटना भएको बिहान १ बजे टाङ्गिया बस्ती नजिकैको जंगलबाट पक्राउ गरेको थियो । महेश माझीलाई बिहान ४ बजेतिर निजगढ नगरपालिका–७ बाट पक्राउ गरिएको एसपी कुँवरले जानकारी दिए ।
