रास्वपा सभापति रवि लामिछानेको अध्यक्षतामा आइतबार राति बसेको केन्द्रीय समितिको विशेष बैठकले उक्त सहमतिको अनुमोदन गर्ने निर्णय गरेको हो। पार्टीका महामन्त्री कविन्द्र बुर्लाकोटीका अनुसार बैठकले राष्ट्रहितका लागि आँट, त्याग र आशा प्रतिबिम्बित गर्ने सहमतिको कार्यान्वयनबाट मुलुकमा व्याप्त भ्रष्टाचार, बेथिति न्यूनीकरण गर्दै सुशासन, समुन्नति, लोकतन्त्र र सामाजिक न्याय स्थापना गर्ने लक्ष्य लिएको छ।
सभापति लामिछाने र मेयर शाहबीच लामो छलफलपछि आइतबार बिहान करिब ४ बजे सहमतिमा हस्ताक्षर भएको थियो। सहमतिअनुसार एकतापछि पार्टीको नाम, झन्डा र चुनाव चिह्न रास्वपाकै रहनेछ।
त्यसैगरी, रास्वपाले आगामी निर्वाचनमा बालेन्द्र शाहलाई प्रधानमन्त्रीको उम्मेदवारका रूपमा अघि सार्ने निर्णय गरेको छ। पार्टी नेतृत्वमा भने सभापति रवि लामिछाने नै कायम रहने र बालेन शाहको वरीयता दोस्रो रहने सहमति भएको जनाइएको छ।
