उनका बुबा भारतीय सेनाको अवकाशप्राप्त कर्णेल हुन् । स्नातकपछि उनी इन्जिनियरिङ पढ्न तत्कालीन सोभियत संघ (हाल रुस) गएका थापा पछि अध्ययन पूरा नगरी नेपाल फर्किएका थिए ।
बादलले अमिक शेरचनबाट कम्युनिस्ट पार्टीको सदस्यता ग्रहण गरेका थिए । सोभियत संघबाट फर्किएपछि उनी भूमिगत राजनीतिमा लागेका थिए । २०५२ देखि २०६३ सालसम्म बादलले भूमिगत राजनीतिक जीवन बिताए । २०३८ सालको राष्ट्रिय पञ्चायतको निर्वाचन बहिष्कारमा लागेका बेला उनलाई पञ्चायती सरकारले पक्राउ गरेको थियो । उनी भरतपुर र वीरगञ्जको कारागारमा क्रमशः ९/१० महिनापछि रिहा भएका थिए ।

त्यसपछि उनी टुक्रिएको दल नेकपा मशालमा आवद्ध भएका थिए । २०४२ सालमा मसालको केन्द्रीय सदस्य बनेका उनले राप्ती अञ्चलको जिम्मेवारी प्राप्त गरेका थिए । २०४४ सालमा उनी बागमती अञ्चलको इन्चार्ज बनेका थिए । त्यसको ८ वर्षपछि तात्कालिक माओवादीले सुरु गरेको जनयुद्धमा उनी संलग्न भए ।

जनयुद्धमा होमिएका उनी आन्तरिक तयारीका लागि रोल्पा गएका थिए । १० वर्ष लामो माओवादी सशस्त्र जनयुद्धमा फौजी योजनाकारको मुख्य भूमिका निर्वाह गरेका बादलले थुप्रै आक्रमणको नेतृत्व गरेका थिए । प्रहरी चौकी, सैनिक ब्यारेक तथा जिल्ला सदरमुकाम आक्रमणमा प्रमुख योजनाकारको रुपमा बादलले भूमिका निर्वाह गरेका थिए ।

माओवादी शान्ति प्रक्रियामा आएपछि भएको पहिलो संविधानसभा निर्वाचनमा प्रचण्ड नेतृत्वको मन्त्रिपरिषद्मा उनी रक्षामन्त्री बनेका थिए । नेकपा माओवादी विभाजन हुँदा उनी मोहन वैद्य पक्षमा लागेका थिए र पछि वैद्य नेतृत्वको पार्टीको महासचिव भए । २०७४ सालको चुनावभन्दा केहीअघि उनी फेरि प्रचण्डको नेतृत्वको माओवादी केन्द्रमा फर्किएका थिए । २०७४ मा बागमती प्रदेशबाट राष्ट्रियसभामा निर्वाचित भए । सोही वर्षको फागुनमा उनी गृहमन्त्री बनेका थिए ।