हुम्लाबाट सुर्खेत जाँदै गरेको यात्रुवाहक बस दुर्घटना भएको छ। दुर्घटना हुँदा तीनजना घाइते भएका छन् । कर्णाली प्रदेश ०२००१ ख ०८९० नम्बरको बस बिहीबार दिउँसो करिब १२ बजे अनियन्त्रित भएर कर्णाली करिडोर सडकमा पल्टिँदा दुर्घटना भएको हो।
दुर्घटनामा तीनजना यात्रु घाइते भएका छन्। घाइते हुनेहरूमा मुगु जिल्ला रारा छायानाथ नगरपालिका– का १८ वर्षीय विशाल विक, दैलेख जिल्ला दुल्लु नगरपालिका– २ की दीपा सोनाम र बाजुरा जिल्ला जगन्नाथ गाउँपालिका– ६ की ४५ वर्षीया प्रेमकला दमाईं रहेका छन्। घाइतेहरूको अवस्था सामान्य रहेको र उनीहरूको उपचार बेर्मा बजारस्थित गोपाल मेडिकलमा भइरहेको प्रहरीले जनाएको छ।
बसका चालक सुर्खेत जिल्ला भेरीगंगा नगरपालिका– ११ का दीपक विक रहेकाे प्रहरी चौकी जुड्डीका प्रमुख रमेश रावले बताए । उनका अनुसार बसमा २३ जना यात्रु सवार थिए।
