ललितपुर महानगरले चक्रपथस्थित घोबीघाटमा साइकलमैत्री आकाशे पुल निर्माण गर्ने भएको छ।
आइतबार ललितपुर महानगरका प्रमुख चिरीबाबु महर्जनले उक्त पुलको उद्घाटन गरेका हुन् । पुल उद्घाटन कार्यक्रममा बोल्दै प्रमुख महर्जनले चक्रपथको धोबीघाट पैदलयात्रीका लागि जोखिमपूर्ण भएको बताउँदै त्यो जोखिम घटाउन आकाशे पुल निर्माण गर्न लागेको बताए ।
उनले भने, ‘सडक सुरक्षित नभएका कारण एक दर्जनभन्दा बढीको यो ठाउँमा ज्यान गइसक्यो, दुर्घटना हुन नदिन पुल बनाउन लागेका हौँ।’
उनले नक्खु खोलामा तीनवटा पुल निर्माण सम्पन्न भइसकेको, चक्रपथको यातायातनजिकै लिफ्टसहितको अपांगतामैत्री पुल निर्माण अन्तिम अवस्थामा पुगेको जानकारी दिए ।
कर्मनाशा खोलामा पनि पुल निर्माणको काम अघि बढाइएको छ। त्यसैगरी, धापाखेलस्थित महादेव खोलामा पनि पुल निर्माण भइरहेको छ ।
महानगर प्रमुख महर्जनले चक्रपथमा सानो किलाकाँटा ठोक्न पनि संघीय सरकारको स्वीकृति लिनुपर्ने भएको बताउँदै त्यो स्वीकृति लिनका लागि धेरै समय लागेको बताए ।
उनले भने, ‘पुल निर्माणका लागि धेरै पहिला नै माग आए पनि स्वीकृति पाउन धेरै समय लागेकाले पुल निर्माणको काममा ढिला सुरु भएको हो’ निर्माणको जिम्मा लिएको कम्पनीलाई समयमै काम सक्ने उनले अनुरोध गरे ।
सुशासन तथा संस्थागत विकास समितिका संयोजक तथा वडा नं.३ वडा अध्यक्ष श्रीगोपाल महर्जनले स्थानीय तह नागरिकको मर्म बुझ्ने सरकार भएको बताए ।
स्थानीयको मागबमोजिम महानगरले यहाँ पुल निर्माणको लागि धेरै अघिदेखि प्रक्रिया अघि बढाए पनि सडक विभागको स्वीकृति समयमै नपाउँदा ढिला भएको जानकारी गराए ।
विकास निर्माणको काममा स्थानीयलाई महानगरसँग समन्वय र सहकार्य गर्न अनुरोध गरे। ललितपुर महानगर अन्य पालिकाभन्दा पृथक् भएको बताउँदै सुशासन र अनुशासन कायम राख्नुपर्ने सबैलाई अनुरोध गरे। वडा नं. ४ का वडाध्यक्ष सन्तोष खड्काले धोबिघाटमा महानगरले निर्माण गर्न लागेको साइकलमैत्री पुलले पैदलयात्रीलाई सहज हुने बताए। ललितपुर महानगरका पूर्वाधार महाशाखा प्रमुख इन्जिनियर प्रदीप पौडेलले चक्रपथको धोबिघाटमा पैदलयालीको सुरक्षाका लागि पुल निर्माण गरिएको बताए।
सडक वारपार गर्दा भएको दुर्घटनाका कारण धेरैले ज्यान गुमाएकाले पैदलयात्रीको सुरक्षालाई प्राथमिकतामा राखेर निर्माण थालेको प्रस्ट पारे।
महानगरका अनुसार पुल निर्माणको सम्झौता रकम ५ करोड ४ लाख ४८ हजार रहेको छ। एक वर्षभित्र निर्माण सम्पन्न हुने यो पुलले दमकल सुन्दरीघाट मार्ग पूर्व र पश्चिमलाई जोड्ने भएकाले चक्रपथ वारपार गर्न सजिलो हुनेछ।
