कञ्चनपुरका विभिन्न सीमावर्ती नाकाहरूमा हेल्प डेस्क स्थापना गरिएका छन्। दसैँ, तिहार, छठलाई लक्षित गरी सीमावर्ती नाकाहरू सर्वसाधारणको सहजताका लागि हेल्प डेस्क स्थापना गरिएका हो।
कञ्चनपुरका प्रमुख जिल्ला अधिकारी लक्ष्मण ढकालले गृह मन्त्रालयको परिपत्रअनुरूप जिल्लाका सीमा नाका, बजारदेखि ग्रामीण क्षेत्रका नागरिकका लागि सहायता कक्ष स्थापना गरिएको बताए।
सुरक्षा निकाय, प्रशासनसहित सरोकारवाला निकायको उपस्थितिमा हेल्प डेस्क स्थापना गरिएका छन्। ‘अहिलेसम्म गड्डाचौकी, ब्रम्हदेव, महेन्द्रनगर बसपार्क, झलारीसहितका स्थानमा नागरिक सहायता कक्ष स्थापना गरिसकेका छौँ,’ उनले भने, ‘कञ्चनपुरका सीमा क्षेत्रमा जहाँ-जहाँ सशस्त्र प्रहरी छन्, त्यहाँ पनि स्वतः हेल्प डेस्क स्थापना हुनेछन्।’
प्रजिअ ढकालले नेपालीहरूका प्रमुख चाडपर्व दशैँ, तिहार र छठलाई लक्षित गरी भारत–नेपाल सीमानाकाबाट आवतजावत गर्ने नागरिकहरूको सहजताका लागि सहायता कक्ष स्थापना गरिएको बताए। तिहारका वेला संकटमा परेका नागरिकलाई सीमा क्षेत्रदेखि बजार बसपार्कसम्मैका स्थानमा समस्यामा परेमा उद्धारलगायतमा हेल्प डेस्कले सहयोग गर्छ।
