राष्ट्रपति रामचन्द्र पौडेलले आयोजना गरेको चियापान कार्यक्रममा काठमाडौं महानगरपालिकाका मेयर बालेन शाह अनुपस्थित भएका छन्।
चियापान कार्यक्रममा एमाले अध्यक्ष केपी शर्मा ओली सुरक्षाको कारण देखाउँदै सहभागी भएका छैनन्। यसैगरी सैनिक अस्पतालमा उपचारका क्रममा रहेका कारण कांग्रेस सभापति शेरबहादुर देउवा र आरजु राणा पनि उपस्थित भएका छैनन्। प्रधानमन्त्री सुशीला कार्कीसहित तीनै जना मन्त्री उपस्थित भएका छन्।
शितल निवासमा गणतन्त्र नेपालका पहिलो राष्ट्रपति डा. रामवरण यादवसहित अनेक नेता पनि पुगेका छन्।
पूर्वराष्ट्रपति विद्या भण्डारी पूर्वप्रधानमन्त्रीत्रय पुष्पकमल दाहाल प्रचण्ड, झलनाथ खनाल र डा. बाबुराम भट्टराई पनि शितल निवासमा देखिएका छन्।
यसैगरी प्रधानन्यायाधीश प्रकाशमानसिंह राउत, सभामुख देवराज घिमिरे, राष्ट्रिय सभा अध्यक्ष नारायण दाहालसहित कुटनीतिक नियोगका प्रमुख पनि पुगेका छन्।
राष्ट्रपति पौडेलले सानो सम्बोधन गरेपछि चियापान हुने बताइएको छ।
जेनजी आन्दोलनका अगुवा हामी नेपालका अध्यक्ष सुदन गुरुङ पनि चियापानमा सहभागी भएका छन्। रास्वपाका नेता शिशिर खनाल पनि देखिएका छन्। यसबाहेक विभिन्न मुलुकका कुटनीतिक नियोग प्रमुख पनि शितल निवासमा उपस्थित भए।
