पोखरा। नेकपा एमाले पोखरा महानगर कमिटि सचिव सुशिल बस्नेतले नेपालमा हालै चर्चामा आएको ‘जेन्जि आन्दोलन’ (Gen-Z movement) मा भएको घुस पेटले देशमा ठूलो क्षति पुर्याउन सक्ने र यसले बंगलादेशमा जस्तै विदेशी हस्तक्षेप बढाउने खतरा रहेको भन्दै गम्भीर चिन्ता व्यक्त गरेका छन्। उनले सामाजिक सञ्जाल फेसबुकमा एक स्टाटस लेख्दै नेपाली युवाहरूलाई चेतना भया भन्दै सचेत गराएका छन्।
बस्नेतले आफ्नो स्टाटसमा बंगलादेशको पछिल्लो राजनीतिक घटनाक्रमलाई उदाहरणको रूपमा प्रस्तुत गरेका छन्। उनका अनुसार राम्रै लयमा अगाडि बढेको बंगलादेशलाई एकाएक विद्यार्थी आन्दोलनले तहसनहस बनायो। आन्दोलनलाई ठूलो ‘परिवर्तन’ भनेर चर्चा गरिए पनि त्यसले कुनै सहि नेतृत्व वा उपयुक्त निकास दिन नसकेको उनको भनाइ छ।
उनले बंगलादेशमा अहिले पनि अशान्ति कायम रहेको र विदेशी हस्तक्षेप व्यापक रूपमा बढेको दाबी गरेका छन्। “हालसालै मात्रै अमेरिकन सेनाहरूको व्यापक हस्तक्षेप छ। झण्डै ४५० भन्दा बढी अमेरिकी सैनिक क्याम्प खडा भईसकेको छ। अशान्तिले सीमा नाघेको छ,” बस्नेतले लेखेका छन्।
बंगलादेशको यही घटनाक्रमलाई नेपालसँग जोड्दै उनले चेतावनी दिएका छन्, “यता नेपाललाई पनि बंगलादेश जस्तै बनाउछौँ भन्नेले खोजेको त्यही होला र ढिलो चाँडो आउने समस्या त्यही हो।”
बस्नेतको यो स्टाटसले नेपालमा देखिएको पछिल्लो युवा तथा विद्यार्थी केन्द्रित आन्दोलनहरूमा बाह्य शक्तिको प्रभाव र त्यसले देशको सार्वभौमसत्तामाथि पार्न सक्ने खतरा बारे प्रश्न उठाएको छ। उनले समयमै सचेत नभए नेपालले पनि विदेशी हस्तक्षेपको गम्भीर परिणाम भोग्नुपर्ने चेतावनी दिएका छन्।
