पोखरा, बैदामस्थित लालुपाते टोल विकास संस्थाले आश्विन १, २०८२ मा एक विशेष श्रद्धाञ्जली सभाको आयोजना गर्यो। जेन जी (Gen Z) आन्दोलन र राष्ट्रसेवक प्रहरीलगायत विभिन्न क्षेत्रमा दिवङ्गत भएका वीर सहिदहरूको सम्झना तथा उनीहरूको आत्माको चिर शान्तिको कामना गर्दै लालुपाते टोलको १७ नम्बर स्ट्रिटको मुख्य प्रवेशद्वारमा ब्यानर र क्यान्डल बालेर यो कार्यक्रम सम्पन्न भएको हो। कार्यक्रममा करिब १०० जनाको सहभागिता थियो।
सो अवसरमा टोल विकास संस्थाका संस्थापक अध्यक्ष गोविन्द राज पहारीले जेन जी आन्दोलनका सहिदहरूको स्मरण गर्दै वर्तमानका युवाहरूलाई परिवर्तनकारी र विवेकशील शक्तिको रूपमा प्रशंसा गर्नुभयो। उहाँले युवाहरूलाई भ्रष्टाचार, बेथिति र विसंगतिका विरुद्ध सधैं आवाज उठाउन र नेपाल तथा नेपालीको हितका लागि व्यक्तिगत स्वार्थ त्यागेर अगाडि बढ्न आग्रह गर्नुभयो।
कार्यक्रममा बोल्दै युवा अभियन्ता तथा पर्यटन व्यवसायी विकास पहारीले अबोध बालबालिकाको त्याग र बलिदानले यो परिवर्तन सम्भव भएको कुरा बताउनुभयो।
उहाँले यो परिवर्तनलाई सार्थक बनाउन हरेक नेपालीले पार्टीभन्दा माथि मातृभूमिलाई राख्नुपर्नेमा जोड दिनुभयो। विकास पहारीले राष्ट्रप्रति इमान्दारिता, खुला दिमाग र सक्रियता भएमा मात्रै नेपालले विकासको बाटोमा फड्को मार्न सक्ने धारणा व्यक्त गर्नुभयो।
