राष्ट्रिय स्वतन्त्र पार्टी (रास्वपा) सभापति रवि लामिछानेको मुद्दा फिर्ता प्रकरणमा सर्वोच्च अदालतमा मंगलबार पनि सुनुवाइ हुने भएको छ ।
सभापति लामिछानेमाथि लागेको सहकारी ठगीसँगै दायर भएको संगठित अपराध र सम्पत्ति शुद्धीकरण मुद्दाको अभियोगपत्र फिर्ता लिने निर्णयविरुद्धको रिटमा मंगलबार पनि सर्वोच्च मा सुनुवाइ हुने भएकाे हाे। सर्वोच्चका न्यायाधीशद्वय सारङ्गा सुवेदी र सुनिलकुमार पोखरेलको संयुक्त इजलासमा आइतबारदेखि उक्त रिटको निरन्तर सुनुवाइ हुँदै आएको हाे ।
आइतबार र सोमबार भएको बहस नसकिएपछि हेर्दाहेर्दैमा राखिएको थियो । गत पुस ३० गते महान्यायाधिवक्ता सविता भण्डारीले लामिछानेमाथि विभिन्न जिल्लामा विचाराधीनमध्ये संगठित अपराध र सम्पत्ति शुद्धीकरणको अभियोग हटाउन जिल्ला सरकारी वकिल कार्यालयलाई निर्देशन दिनुभएकाे थियाे । महान्यायाधिवक्ता भण्डारीको यो निर्णयविरुद्ध वरिष्ठ अधिवक्ता दिनेश त्रिपाठी, कानूनका विद्यार्थी आयुष बडाल र युवराज पौडेल सफलले सर्वोच्चमा छुट्टाछुट्टै रिट दायर गरेका थिए ।
सर्वोच्चको यो सुनुवाइपछि सभापति लामिछानेको मुद्दामा महान्यायाधिवक्ता कार्यालयको निर्देशन कायम रहने वा नरहने भन्ने बारेमा टुंगो लाग्ने भएकाे हाे ।
