मध्यपूर्वमा जारी युद्धका बीच इरानले खाडी क्षेत्रका ऊर्जा पूर्वाधारमा आक्रमण तीव्र बनाएको भन्दै क्षेत्रभरि चिन्ता बढेको छ । पछिल्ला केही घण्टामा बहराइनमा इन्धन भण्डारण ट्यांकीहरूमा आक्रमण भएको खबर आएको छ ।
यसअघि बुधबार सलालाह बन्दरगाह सहरमा रहेका इन्धन ट्यांकीहरूमा ड्रोन आक्रमण भएको थियो । त्यही दिन हर्मुज जलडमरु क्षेत्रमा एउटा मालवाहक जहाज पनि निशाना बनाइएको थियो । घटनामा तीन नाविक अझै बेपत्ता रहेको बताइएको छ भने ओमानको शाही नौसेनाको तटरक्षक बलले २० जना नाविकलाई उद्धार गरेको छ ।
यो घटना अमेरिकी राष्ट्रपति डोनल्ड ट्रम्पले हर्मुज जलडमरूमध्यमा जहाजलाई निशाना नबनाउन र माइन नबिछ्याउन इरानलाई चेतावनी दिएको केही समयपछि भएको बताइएको छ । इरानी पक्षले भने थाइल्याण्डको झण्डा बोकेको जहाजले आफ्ना आदेश बेवास्ता गरेको कारण त्यसलाई निशाना बनाइएको दाबी गरेको छ । इरानले हर्मुज जलडमरूमध्यबाट गुड्ने सबै जहाजले आफ्नो अनुमति लिनुपर्ने भन्दै चेतावनी दिएको छ ।
इरानले अमेरिका र उसका सहयोगी देशहरूलाई पनि उक्त जलडमरूमध्य प्रयोग गर्न नदिने चेतावनी दिएको छ । विश्वको करिब २० प्रतिशत तेल आपूर्ति यही साँघुरो समुद्री मार्गबाट हुने भएकाले त्यहाँको सुरक्षा अवस्थाले विश्व ऊर्जा बजारमा ठूलो प्रभाव पार्ने देखिएको छ । इरानमा युद्ध चर्किदै गएसँगै हालैका दिनमा विश्व बजारमा कच्चा तेलको भाउमा तीव्र उतारचढाव आइरहेको छ । बिहीबार पनि तेलको अन्तरराष्ट्रिय बेञ्चमार्कको भाउ बढेर प्रतिब्यारेल सय डलर माथि उक्लिएको छ ।
