अमेरिकी राष्ट्रपति डोनाल्ड ट्रम्पले रुसी राष्ट्रपति भ्लादिमिर पुटिन युक्रेनको राजधानी कीएभसहित अन्य सहरहरूमा एक सातासम्म आक्रमण नगर्न सहमत भएको दाबी गरेका छन्। युक्रेनमा बढ्दो अत्यधिक चिसो र हिमपातलाई मध्यनजर गर्दै आफूले गरेको आग्रहलाई पुटिनले स्वीकार गरेको ट्रम्पले बताएका हुन्।
रुसले यसबारे आधिकारिक पुष्टि नगरे पनि युक्रेनी राष्ट्रपति भोलोदिमिर जेलेन्स्कीले यस कदमको स्वागत गर्दै रुसले आफ्नो वाचा पूरा गर्ने विश्वास व्यक्त गरेका छन्। वासिङ्टनमा आयोजित मन्त्रिपरिषद् बैठकमा बोल्दै राष्ट्रपति ट्रम्पले आफूले व्यक्तिगत रूपमा पुटिनलाई फोन गरेर एक साताका लागि बमबारी रोक्न आग्रह गरेको र त्यसमा सहमति जुटेको जानकारी दिए।
‘धेरैले फोन गरेर समय खेर नफाल्नु, पुटिन मान्दैनन् भनेका थिए, तर उनी सहमत भए,’ ट्रम्पले भने। युक्रेनमा आगामी केही दिनमा तापक्रम माइनस २४ डिग्री सेल्सियससम्म झर्ने अनुमान गरिएको छ। यस्तो कठ्याङ्ग्रिने चिसोमा रुसले युक्रेनको ऊर्जा पूर्वाधारलाई लक्षित गरी आक्रमण तीव्र बनाएपछि जनजीवन कष्टकर बनेको छ।
युक्रेनी राष्ट्रपति जेलेन्स्कीले सामाजिक सञ्जालमार्फत ट्रम्पको प्रयासलाई ‘महत्त्वपूर्ण’ भन्दै यसले चरम जाडोको समयमा नागरिकलाई सुरक्षा दिने आशा व्यक्त गरेका छन्। संयुक्त अरब इमिरेट्स (यूएई) मा हालै भएको त्रिपक्षीय वार्तापछि यो नयाँ विकासक्रम सार्वजनिक भएको हो।
स्रोतका अनुसार रुसले आक्रमण रोकेमा युक्रेनले पनि जवाफमा रुसी तेल प्रशोधन केन्द्रहरूमा गर्दै आएको आक्रमणलाई स्थगित गर्ने सहमति जनाएको छ। रुसी आक्रमणका कारण युक्रेनका प्रमुख सहरहरूमा विद्युत् र तातो बनाउने प्रणाली (हिटिङ) ठप्प हुँदा लाखौँ मानिस अन्धकार र चिसोमा बस्न बाध्य छन्।
प्राविधिकहरूले मर्मत गरे पनि रुसी हवाई आक्रमणले पुनः क्षति पुर्याउने गरेकाले बिजुली आपूर्ति केही घण्टा मात्र टिक्ने गरेको छ। यदि यो युद्धविराम लागू भएमा मर्मत सम्भार र नागरिकलाई राहत पुग्ने अपेक्षा गरिएको छ। यद्यपि, मैदानमा आक्रमणहरू अझै पूर्ण रूपमा रोकिएका छैनन्।
