नेपाली कांग्रेसको विशेष महाधिवेशनबाट निर्वाचित सभापति गगन थापाले निर्वाचन आयोगले शनिबारसम्म अद्यावधिकको विषय टुङ्ग्याउने विश्वास लिएको बताएका छन् ।
बिहीबार नवनिर्वाचित कार्यसमितिको अद्यावधिक गर्ने पत्र कार्यवाहक प्रमुख निर्वाचन आयुक्तलाई बुझाएपछि सञ्चारमाध्यमसँग बोल्दै उनले यस्तो बताएका हुन् ।
महाधिवेशनले बिहीबार बिहान निर्वाचन प्रक्रिया टुङ्ग्याएर १३७ सदस्यीय कार्यसमिति निर्वाचित गरेको थियो । सम्पूर्ण पदाधिकारी तथा कानुनविद्सहित आयोग पुगेर सभापति थापासहित यो विवरण अद्यावधिकका लागि बुझाएका हुन् ।
थापाले फागुन २१ गते हुन गइरहेको निर्वाचनका लागि माघ ६ गतेसम्म प्रत्यक्षतर्फको सूची बुझाउनुपर्ने बाध्यात्मक व्यवस्था रहेको भन्दै त्यसका लागि आयोगले समयमै अद्यावधिक गरिदिने विश्वास व्यक्त गरेका थिए ।
सो क्रममा कार्यवाहक निर्वाचन आयुक्त रामप्रसाद घिमिरेले यसबारे कुनै प्रतिक्रिया नदिई थापाले बुझाएको विवरण लिएर बाहिरिएका थिए ।
