नेपाली कांग्रेसको विशेष महाधिवेशनबाट निर्वाचित कार्यसमितिमा कर्णालीले एक पदाधिकारी र ८ जना केन्द्रीय सदस्य पाएको छ ।
हाल शेरबहादुर देउवा समूहमा रहेका कांग्रेस कार्यवाहक सभापति पूर्णबहादुर खड्काकै गृह प्रदेश कर्णालीबाट ३१२ मध्ये १३४ जनाभन्दा धेरै महाधिवेशन प्रतिनिधि विशेष महाधिवेशनतर्फ खुलेका थिए ।
विशेष महाधिवेशनबाट गगनकुमार थापाको नेतृत्वको कार्य समिति बन्दा कर्णालीमा
पिछडिएको क्षेत्रबाट सहमहामन्त्रीमा कर्णबहादुर बुढा चयन भएका छन् । डोल्पाका उनी यसअघि केन्द्रीय सदस्य थिए । उनी एक पटक सांसद समेत भइसकेका नेता हुन् ।
यस्तै केन्द्रीय सदस्यमा सुर्खेतकी जानकी सिंह, जाजरकोटका दिपकजंग शाह, कालिकोटबाट नारायण प्रसाद भट्टराई, दैलेखका सुर्य विक केन्द्रीय सदस्य निर्वाचित भएका छन् ।
यस्तै, जुम्लाका तिर्थजंग शाही, दैलेखका दिक्पाल शाही, कालिकोटकी छाया सुनार र जुम्लाकी रामदेवी खड्का केन्द्रीय सदस्य निर्वाचित भएका छन् ।
सुर्खेतकी सिंह १४ औँ महाधिवेशनमा संस्थापनबाट केन्द्रीय सदस्य बनेकी थिइन् । उनी अहिले पनि कर्णाली प्रदेश सभा सांसद छिन् । यस्तै, कालिकोटका भट्टराई अघिल्लो पटक केन्द्रीय सदस्यमा पराजित भएका थिए । दैलेखका शाही ०७९ को निर्वाचनमा दैलेख—२ बाट प्रतिनिधि सभामा निर्वाचित भएका थिए ।
१४औँ महाधिवेशनमा एक उपसभापति र ५ जना केन्द्रीय सदस्य कर्णालीबाट थिए ।
