अमेरिकी राष्ट्रपति डोनाल्ड ट्रम्पले शनिबर भेनेजुएलाको तथा यस वरिपरि हवाई क्षेत्रलाई ‘पूर्ण रूपमा बन्द’ ठान्नुपर्ने कडा चेतावनी दिएका छन्। यो चेतावनी वामपन्थी राष्ट्रपति निकोलस मदुरोसँगको लामो राजनीतिक तथा कूटनीतिक द्वन्द्वको ताजा रूप हो।
ट्रम्पले आफ्नो ट्रुथ सोसलमा लेखेका छन्, ‘सबै एयरलाइन्स, पाइलटहरू, लागुऔषध व्यापारीहरू तथा मानव बेचबिखनकर्ताहरूका लागि, कृपया भेनेजुएलाको आकाश र वरपरको आकाशलाई यसको सम्पूर्ण क्षेत्रमा बन्द भएकोजस्तै विचार गर्नुस्।’ उनले यो चेतावनीको कारण वा थप कदमबारे भने विस्तारमा केही भनेनन्।
यसैबिच अमेरिकी प्रशासनले क्यारिबियन क्षेत्रमा ठुलो विमानवाहक जहाजसहित सैन्य शक्ति तैनाथ गरी भेनेजुएलामा दबाब बढाइरहेको बेला यो अभिव्यक्ति आएको हो। वासिङ्टनले यो सैन्य क्रियाकलाप लागुऔषध तस्करी रोक्नका लागि भएको दाबी गरिरहेको छ, तर काराकासले भने यसलाई शासन परिवर्तनको बहानाको रूपमा आरोप लगाउँदै आएको छ।
अमेरिकी सेनाले सेप्टेम्बरदेखि क्यारिबियन सागर तथा पूर्वी प्रशान्त क्षेत्रमा भेनेजुएलासँग जोडिएका २० भन्दा बढी लागुऔषध तस्करीमा संलग्न ठानिएका जहाजहरूलाई निशाना बनाई कारबाही गरेको थियो, जसमा ८० भन्दा बढी व्यक्तिको मृत्यु भएको जनाइएको छ। तर वासिङ्टनले यी जहाजहरू लागुऔषध तस्करीमा प्रयोग भएको वा अमेरिकालाई खतरा बनेको ठोस प्रमाण भने सार्वजनिक गर्न सकेको छैन।
विस्तारित सैन्य अभियान र निरन्तर कारबाहीका कारण क्षेत्रीय तनाव थप चर्किएको छ। यसबिच न्युयोर्क टाइम्सको शुक्रबारको रिपोर्टअनुसार ट्रम्प र मधुरोबिच गत हप्तामात्र फोन वार्ता भएको र अमेरिकामा प्रत्यक्ष भेटबारे प्रारम्भिक छलफल पनि भएको उल्लेख छ।
ट्रम्पले भेनेजुएलाबाट हुने लागुऔषध तस्करी रोक्ने प्रयास ‘महत्त्वपूर्ण चरणमा’ पुगेको भन्दै काराकाससँग तनाव सार्वजनिक रूपमा बढाएको एक दिनपछि दुवैबिचको फोन वार्ताको यो समाचार बाहिर आएको हो।
ट्रम्पको यो चेतावनीपछि भेनेजुएलाले यसलाई ‘साम्राज्यवादी धम्की’ को रूपमा कडा अस्वीकार गरेको छ। अमेरिकी विमान प्राधिकरण (एफएए) ले गत हप्ता नै हवाई क्षेत्रमा ‘बिग्रँदो सुरक्षा स्थिति’ र बढ्दो सैन्य क्रियाकलापका कारण जोखिमको चेतावनी जारी गरेको थियो।
भेनेजुएलाले एफएए चेतावनीपछि उडान रोकेका छ वटा अन्तर्राष्ट्रिय एयरलाइन्सका सञ्चालन अनुमति खारेज गरेको छ। ट्रम्प प्रशासनले अब भूमिमा पनि सैन्य कारबाही चाँडै सुरु गर्ने संकेत दिएको छ, जसले तनाव झन् बढाउने आशंका गरिएको छ। अमेरिकी अधिकारीहरू पनि यो हवाई क्षेत्र बन्द गर्ने घोषणाबाट चकित छन्। एजेन्सी
