नेपालका ६ महिला क्रिकेटरले मलेसियाको घरेलु क्रिकेट खेल्ने भएका छन् । नेपाल क्रिकेट संघ (क्यान)ले मलेसियन क्रिकेट एसोसिएसनको आयोजनामा १६ देखि २८ अक्टोबरसम्म हुने एमसिए महिला इन्टरस्टेट टी–२० च्याम्पियनसिपमा नेपालका ६ खेलाडीले प्रतिस्पर्धा गर्न लागेको जानकारी दिएको छ । सीता रानामगर, कविता जोशी, राजमती ऐरी, रुबिना क्षेत्री, पूजा महतो र कविता कुँवरले मलेसियन घरेलु क्रिकेट प्रतियोगिता खेल्ने क्यानका प्रवक्ता छुम्बी लामाले बताए ।
क्वालालम्पुरमा आयोजना हुने च्याम्पियनसिपमा सीता, कविता जोशी र राजमतीले सेलाङगोन क्रिकेट एसोसिएसनबाट प्रतिस्पर्धा गर्नेछन् । नेपालकी पूर्वकप्तान, रुबिना, पूजा र कुँवरले सारावाक क्रिकेट एसोसिएसनमा आबद्ध भएको छुम्बीले बताए । यसै साता नेपालले मलेसियाको राष्ट्रिय महिला क्रिकेट टोलीविरुद्धको पाँच खेलको टी–२० आई सिरिज खेलेको थियो ।
जसमा नेपाल ३–२ ले विजयी भयो । मलेसियाविरुद्धको सिरिजअघि नेपालका १४ क्रिकेटरले मलेसियाको महिला फ्रेन्चाइज लिग पनि खेलेका थिए । फ्रेन्चाइज लिगपछि नेपाली टोली पाँच खेलको टी–२० आईमा सहभागी भएको थियो ।
ग्लोबल छनोटअघि राम्रो सिरिज
मलेसियाको भ्रमणबाट नेपाली महिला टोली बिहीबार राति स्वदेश फर्केको छ । ६ जनाबाहेकका खेलाडी मात्र स्वदेश फर्किएका हुन् । नेपाली टोलीकी कप्तान इन्दु बर्माले मलेसियासँगको सिरिज राम्रो भएको बताइन् । आइसिसी टी–२० विश्वकपअन्तर्गत ग्लोबल छनोटमा स्थान बनाएको नेपालले मलेसियासँगको सिरिजबाट राम्रो अनुभव प्राप्त गरेको कप्तान इन्दुले बताइन् । ‘ग्लोबल छनोटअघिको टी–२० आई सिरिज निकै राम्रो भयो,’ त्रिभुवन विमानस्थलमा उनले भनिन्, ‘अझ पाँचवटै खेल जित्न पाएको भए थप उत्कृष्ट हुने थियो ।’
मलेसियासँगको सिरिजमा नेपालले अन्तिम तथा पाँचौँ खेलमा पाँच विकेटको जित निकाली उपाधि हात पारेको थियो । समग्रमा नेपाल सिरिजमा ३–२ ले विजयी रह्यो । नेपाल पहिलो खेलमा मलेसियासँग तीन रनले पराजित भएको थियो । त्यसपछि दोस्रो खेलमा उत्कृष्ट पुनरागमन गरी नेपालले मलेसियामाथि ६ विकेटको जित निकाल्यो । मलेसियाले तेस्रो खेलमा १३ रनले बाजी मारेको थियो । चौथो खेलमा नेपाल ६ विकेटले विजयी हुँदा सिरिज २–२ को बराबरीमा पुगेको थियो ।
यसैगरी, नेपाली टोलीकी उपकप्तान पूजाले विदेशी भूमिमा धेरै खेल्दा सबै खेलाडीले आफ्नो प्रतिभा सुधार्न अवसर पाउने बताइन् । ‘जुनियर खेलाडीलाई पनि यहाँ राम्रो प्रदर्शन गरेर नेपालका लागि खेल्ने अवसर मिलेको छ,’ उनले भनिन्, ‘यसले ग्लोबल छनोटका लागि पनि हाम्रो आत्मविश्वास बढाउनेछ ।’ नेपाल पहिलोपटक टी–२० विश्वकपको एसिया छनोट पार गरेर ग्लोबल छनोटमा पुगेको छ । ग्लोबल छनोट सन् २०२६ को जनवरीमा नेपालमै हुँदै छ । नेपाललाई पहिलोपटक विश्वकप खेल्ने अवसरसमेत छ ।
