राष्ट्रपति रामचन्द्र पौडेलको पहलमा शुक्रबार अन्तरिम सरकार र राजनीतिक दलबिच बैठक बसेको छ। फागुन २१ गते तोकिएको प्रतिनिधिसभा निर्वाचनको विषयलाई लिएर राष्ट्रपति पौडेलले अन्तरिम सरकार र दलहरूबिच छलफल बोलाएका थिए।
निर्वाचन तोकिए पनि अन्तरिम सरकार, स्वयं प्रधानमन्त्री सुशीला कार्कीले दलहरूसँग कुनै पनि समन्वय नगरेको गुनासो थियो। उक्त गुनासो सम्बोधन गर्नेमा प्रधानमन्त्री कार्कीले पनि अग्रसरता देखाएकी थिइनन्। यस्तोमा चुनावको भविष्यबारे अनेक शंकाहरू उब्जिरहेका थिए। यही कारण राष्ट्रपति पौडेलले संवादहीनताको अन्त्य गर्न पहल गरेका थिए।
बैठकपछि सरकारका प्रवक्ता एवं सूचना, प्रबिधि तथा सञ्चार मन्त्री जगदीश खरेलले मुलुक निर्वाचनको बाटोमा अघि बढेको दाबी गरे।
‘जेन–जीका महत्वपूर्ण मागहरुलाई सम्बोधन गर्दै चुनाव गर्ने बाटोमा सरकार पनि अघि बढेको छ। त्यसबाहेक जेन–जीका अरु माग पनि सम्बोधन गर्ने बाटोमा सरकार लागेको छ,’ उनले भने, ‘राजनीतिक दलले पनि चुनावमा भाग लिन्न भनेको अवस्था नरहेकोले चुनावको वातावरण बनेको छ।’ निर्वाचन आयोग पनि कार्यतालिका बनाएर अघि बढेको उनले बताए।
यस्तै सुरक्षा निकायले पनि आफ्नो मनोबल कम भएको नभनेको मन्त्री खरेलले दाबी गरे। उनले भने, ‘सुरक्षा निकायले पनि के स्पष्ट रूपमा भनेका छन् भने सुरक्षाकर्मीको मनोबल घटेको छैन।’
राष्ट्रपतिले वातावरण बनाइदिएपछि निर्वाचन निश्चित भएको पनि उनले दाबी गरे। ‘निर्वाचन गराउनको लागि सरकार, राजनीतिक दल र स्वयं राष्ट्रपति ज्युले पनि एउटा वातावरण बनाइदिएको अवस्थामा सुरक्षाकर्मी पनि चुनावको लागि उच्च मनोबलका साथ तयार रहेको भएको अवस्थाले अब मुलुक चाहीँ चुनावको बाटोमा अगाडि बढ्यो, संवादहीनताको अन्त्य भयो,’ उनले भने, ‘संवादको सुरुवात भयो र देश, जनता, राजनीतिक दल, हामी सबै र जेन–जीको साथमा पनि चुनावको बाटोतिर अघि बढ्यौं भन्ने कुराको सुरुवात भएको छ।’
