पूर्वगृहमन्त्री एवं कांग्रेस नेता रमेश लेखकले आग्रह, पूर्वाग्रह र राजनीतिक प्रतिशोधबाट माथि उठेर काम गर्नुपर्ने बताएका छन्। शुक्रबार सानेपामा पत्रकारहरूसँग कुरा गर्दै लेखकले मुलुक गम्भीर अवस्थामा रहेकाले संयमित भएर अघि बढ्नुपर्ने धारणा राखेका हुन्।
‘अहिलेको समय उत्तेजित हुने, आग्रह–पूर्वाग्रह राखेर अथवा राजनीतिक प्रतिशोध राखेर काम गर्ने समय होइन। अहिले मुलुकलाई लोकतान्त्रिक मूल्य र मान्यतामा अगाडि बढाएर मुलुकलाई ठिक ठाउँमा पुर्याउनका निमित्त हामीले आग्रह, पूर्वाग्रह, उत्तेजनाबाट माथि उठेर, प्रतिशोधबाट माथि उठेर एक–अर्काका भावनाहरू समेटेर, बुझेर ठिक ढंगले अगाडि जानुपर्छ। यो कुरा सरकार होस् कि आयोगमा बसेका साथीहरू अथवा पार्टीका नेताहरू सबैले बुझ्नुपर्छ,’ उनले भने।
