होटेल संघ पोखराले पर्यटन क्षेत्रको विकास र सुरक्षाका लागि काम गर्न भन्दै तीन दर्जन उपसमिति गठन गरेको छ । संघको कार्यालयमा बिहीबार सम्पन्न व्यवसायीको भेलाले पर्यटन क्षेत्रको विकास र सुरक्षाका लागि र जेन–जी प्रदर्शनपछि प्रभावित हुन पुगेको पर्यटन क्षेत्रलाई पुरानै लयमा फर्काउन, पर्यटक र व्यवसायी तथा टोलवासीको सुरक्षाका लागि काम गर्न ती उपसमिति गठन गरेको हो ।
भेलाले लेकसाइड र ड्यासाइट क्षेत्रका विभिन्न सडक, सहायक सडक र टोलहरूलाई समेटेर समिति गठन गरेको हो । भेलाले २८ वटा स्ट्रिट र ६ वटा टोलहरूलाई लक्षित गरी संयोजक तोकेको संघका अध्यक्ष लक्ष्मण सुवेदीले जानकारी दिए । तोकिएका संयोजकहरूले स्थानीय व्यवसायी र टोलवासीसँग छलफल गरी सदस्यहरु तोकेर उपसमितिलाई पूर्णता दिने सुवेदीले बताए । साथै उल्लेखित स्ट्रिटबाहेक ड्यामसाइड, खहरेचोक, गैह्राचौतारा, हल्लनचोक, जरेबर र ठाडोपसल क्षेत्रमा समेत यस्ता संयोजक तोकिएको उनले बताए ।
गठित समितिले सबै होटेल र टोलका सिसिटिभी क्यामेरा चालू अवस्थामा राख्ने, बिग्रेका क्यामेरा र प्रणालीको मर्मत गर्ने, सुरक्षाकर्मीको आत्मबल बढाउन मद्दत गर्ने, सुरक्षाका लागि सहकार्य गरेर अगाडि बढ्ने, सडकबत्तीको मर्मतसम्हार गर्ने र खाल्डाखुल्डी परेका सडकलाई मर्मत गर्ने काममा सघाउने सुवेदीले जानकारी दिए ।
हाल पर्यटन क्षेत्रमा चोरीका घटना पनि फाट्टफुट्ट देखिन थालेको भन्दै संघले सुरु गरेको अभियान कसैप्रति लक्षितभन्दा पनि व्यवसायीको हकहित, पर्यटनको विकास र पर्यटकको सुरक्षासँग सम्बन्धित रहेको सुवेदीले बताए । यसले व्यवसायीलाई जागरुक बनाउने र पर्यटकलाई गुणस्तरीय सेवा दिन एकजुट बनाएको उनको भनाइ छ ।
