नेपाली महिला राष्ट्रिय क्रिकेट टोलीले मलेसियाविरुद्धको टी–२० अन्तर्राष्ट्रिय सिरिज ३–२ ले हात पारेको छ । क्वालालम्पुरस्थित बायोमास क्रिकेट ओभलमा बुधबार अन्तिम खेल भएको थियो । यसअघि नेपाल र मलेसियाले सिरिजमा समान दुई खेल जितेका थिए । पाँचौँ खेलमा विजयी हुने टोली सिरिजको विजेता बन्ने थियो । बायोमास मैदानमा भएको निर्णायक खेलमा नेपालले मलेसियालाई पाँच विकेटले हरायो ।
टस जितेर ब्याटिङ गरेको मलेसियाले २० ओभरमा सात विकेट गुमाउँदै १०३ रनको योगफल बनाएको थियो । प्रत्युत्तरमा नेपालले १८ ओभरमा पाँच विकेट गुमाएर १०४ रन जोड्दै सिरिजमाथि कब्जा जमाएको हो । अन्तिम खेलमा पनि नेपाली खेलाडीले बलिङ र फिल्डिङमा कमजोर प्रदर्शन गरेका थिए ।
सन् २०२३ मा पनि नेपाली महिला टोलीले मलेसिया भ्रमणको सिरिज ३–२ ले नै जितेको थियो । मलेसियन भूमिमा नेपाली टोली ब्याक टु ब्याक सिरिज जित्न सफल भयो । यसअघि पाँच खेलको सिरिजमा मलेसियाले पहिलो खेलमा नेपालमाथि ३ रनको रोमाञ्चक जित निकालेको थियो । दोस्रो खेलमा नेपालले मलेसियालाई ६ विकेटले हरायो । तेस्रो खेलमा मलेसिया १३ रनले विजयी भयो । चौथो खेल ६ विकेटले जित्दै नेपाल सिरिज २–२ को बराबरी गर्न सफल भयो । निर्णायक खेलमा नेपालकी बलर राजमती ऐरीले घातक बलिङ गरेकी थिइन् । उनले १५ रन खर्चेर मलेसियाका तीन खेलाडीलाई आउट गरिन् । यसै प्रदर्शनका कारण उनी खेलकै म्यान अफ दी म्याच भइन् ।
शीर्ष र मध्यक्रमको सन्तुलित ब्याटिङ
नेपालले १०४ रनको लक्ष्य पछ्याउँदा शीर्ष तथा मध्यक्रमका ब्याट्सम्यानले सन्तुलित प्रदर्शन गरेका थिए । स्कोर बोर्डमा धेरै योगदान नगरे पनि उनीहरूले आवश्यक रन भने बटुलेका थिए । सम्झना खड्का र रुवि पोद्दारले २.३ ओभरमा १६ रनको साझेदारी गरे । सम्झनाले १० बलमा एक चौका प्रहार गरी १३ रन बनाइन् । त्यसपछि रुवि र कविता कुँवरबिच दोस्रो विकेटका लागि ३८ रनको महŒवपूर्ण साझेदारी भयो । ओपनर रुविले आफ्नो विकेट ८.२ ओभरमा गुमाउँदा नेपाल ५४–२ को स्थितिमा रह्यो । रुविले २५ बलमा दुई चौकाको सहयोगमा सर्वाधिक २६ रनको योगदान दिइन् ।
कविताले १९ बलमा १४ रन जोडिन् । पूजा महतो र कप्तान इन्दु बर्माले चौथो विकेटका लागि १६ रनको साझेदारी गरे । इन्दुले १३ बलको सामना गरी ८ रन बनाइन् । पूजा र पूर्वकप्तान रुविना क्षेत्रबिच पाँचौँ विकेटका लागि २८ रनको साझेदारी भयो । यही साझेदारी नै नेपालको जित आधार बन्यो । पूजा इनिङ्सको १७.३ ओभरमा आउट भइन् । उनले २४ बलमा एक चौकाको सहयोगमा २३ रनको योगदान दिइन् । रुविनाले १५ रनको नटआउट इनिङ्स खेलिन् ।
नेपालको कसिलो बलिङ
पहिलो ब्याटिङ गरेको मलेसियाले स्कोर बोर्डमा ठुलो योगफल बनाउन सकेन् । विशेषगरी कविता कुँवर र राजमतीले घातक बलिङ गर्दा मलेसियाले निरन्तर विकेट गुमायो । कविताले चार ओभरमा १३ रन खर्चंदै तीन विकेट लिइन् । रचना चौधरीले एक विकेट आफ्नो नाममा लेखाइन् । मलेसियाले पहिलो विकेटका लागि गतिलो साझेदारी पाएको थियो । अना हमिजा र विनिफ्रेडले ६.४ ओभरमा ३९ रन बनाएका थिए । अनाले १९ बलमा १५ रन जोड्नि । ओपनर विनिफ्रेडले सर्वाधिक ४० रन बनाइन् । उनले आफ्नो इनिङ्समा पाँच चौका प्रहार गरेकी थिइन् । यसैगरी, माहिरा इज्जतीले १९ र नुर डानियाले ११ रन बनाएका थिए ।
