चौकीमा ढुंगामुढा गरी प्रहरीको दाँत भाँचेको भन्दै गोडैता नगरपालिका–७ का वडाध्यक्षलाई प्रहरीले पक्राउ गरेको छ।
१७ असोजमा गोडैता नगरपालिका–७ का वडाध्यक्ष छोटेलाल भनिने बिनेशकुमार दासलगायतकोे समूहले गोडैता प्रहरी चौकीमा ढुंगामुडा र बाँसको भाटा प्रहार गरेको प्रहरीको आरोप छ। घटनामा गम्भीर घाइते भएका प्रहरी चौकीका प्रहरी नायब निरीक्षक अवधेशप्रसाद यादवको जाहेरीको आधारमा प्रहरीले वडाध्यक्ष दासलाई पक्राउ गरेको हो।
वडाध्यक्ष दासविरुद्ध जिल्ला अदालत सर्लाहीले हिजो मात्र पक्राउ पुर्जी जारी गरेको थियो। घटनाको विषयमा थप अनुसन्धान भइरहेको जिल्ला प्रहरी कार्यालय सर्लाहीका प्रवक्ता प्रहरी नायब उपरीक्षक सरोज राईले जानकारी दिए। प्रहरी नायब उपरीक्षक राईका अनुसार दासलाई प्रहरीले बागमती नगरपालिकास्थित इलाका प्रहरी कार्यालय कर्मैया नजिकैबाट पक्राउ गरेको हो।
जिल्ला प्रहरी कार्यालय सर्लाहीका अनुसार १७ असोज साँझको समयमा दुर्गा पूजाको चन्दाको विषयमा गोडैता नगरपालिका–७ सडकमा स्थानीय कारिल यादवलाई गोडैता नगरपालिका–५ बस्ने अनिलराय यादवलगायतले कुटपिट गरेका थिए। घटनामा संलग्न अनिल रायलाई गोडैता प्रहरीले पक्राउ गरेको थियो।
त्यसपछि एक्कासि कारिल यादव पक्षका वडाध्यक्ष दाससहितका केही व्यक्तिले प्रहरी चौकीमाथि ढुंगामुडा तथा बाँसको भठ्ठा प्रहार गरेका हुन्। घटनामा चौकीमा कार्यरत प्रहरी नायब निरीक्षक यादवको मुखमा गहिरो चोट लागेको छ। ढुंगाले लागेर उनको अगाडिको दुईवटा दाँत भाँच्चिनुका साथै चौकीमा कार्यरत अन्य पाँचजना प्रहरी घाइते भएका थियो।
घाइते प्रहरी नायब निरीक्षक यादवको प्रतिवेदनको आधारमा वडाध्यक्ष दास घटनामा संलग्न देखिएको र उनीविरुद्ध कुटपिट अंगाभंग, ज्यान मार्ने उद्योग तथा आपराधिक उपद्रव शीर्षकमा जाहेरी दर्ता भएको प्रहरी नायब उपरीक्षक राईले बताए। अदालतबाट घटना अनुसन्धानका लागि प्रहरीले तीन दिनको म्यादसमेत थप गरेको जनाएको छ।
वडाध्यक्ष दासलाई प्रहरीले राजनीतिक प्रतिशोध साधेर पक्राउ गरेको भन्दै गोडैतामा विरोध भएको छ। घटना संलग्न नरहेका वडाध्यक्षलाई आरोपित गरिएको गोडैता नगरपालिकाका मेयर देवेन्द्रकुमार यादवले बताए। उनले वडाध्यक्षको बचाउ गर्दै उनीविरुद्ध झुटा मुद्दा दायर गरिएको भन्दै आक्रोश व्यक्त गरे।
वडाध्यक्ष पक्राउ गरेको विरोधमा स्थानीय व्यापारीहरूले समेत गोडैता बजार बन्द गराएका छन्। वडाध्यक्ष दासलाई विनासर्त रिहाको मागसहित व्यापारीहरूले बजार बन्द गरेपछि गोडैता बजार सुनसान बनेको छ। स्थानीयले विरोध गर्न सक्ने भएपछि जिल्लाबाट ठुलो संख्यामा सुरक्षाकर्मीसमेत परिचालन गरिएको छ।
