एमाले अध्यक्ष एवं पूर्व प्रधानमन्त्री केपी शर्मा ओलीले सोमबार देशभरका एमाले जिल्ला अध्यक्ष अध्यक्षहरूसँग भर्चुअल बैठक सम्पन्न गरेका छन् ।
बैठकमा ओलीले अहिलेको अवस्थामा नेतृत्व परिवर्तन गर्ने कुरा उपयुक्त नभएको र केन्द्रीय कमिटी बैठकले जे निर्णय गर्छ त्यो नै अन्तिम निर्णय हुने बताएका छन् ।
एमाले पाँचथर जिल्ला अध्यक्ष विमल सापकोटाका अनुसार अध्यक्षहरूले जेन-जी आन्दोलन सकारात्मक रहेको तर त्यसमा घुसपैठ भएर देशको जनधन क्षति भएकोप्रति गम्भीर आपत्ति जनाएका थिए ।
‘जेन-जीले उठाएका मागप्रति हाम्रो कुनै विमति छैन तर त्यसमा राष्ट्रिय अन्तर्राष्ट्रिय तत्त्वले ठूलो घुसपैठ गरेको छ । यसको समीक्षा हुनुपर्छ । देश नै दुर्घटनातर्फ जाने दिशामा लागेकाले यसको उपयुक्त छानबिन हुनु जरुरी छ ।’ उनले भने, ‘अहिले उहाँले नेतृत्व छोड्ने कुरा गर्नुभएको छैन केन्द्रीय कमिटी बैठकले जे निर्णय गर्छ त्यो निर्णयलाई म मान्छु भन्नुभएको छ । परिस्थिति बुझेर मात्रै नेतृत्व छोड्न परे छोड्न तयार छु । परिस्थिति बुझेर मात्रै काम गर्छु भन्नुभयो ।’
अध्यक्ष ओलीले जिल्लाका नेतृत्वहरूलाई पनि यो कुरा बुझाएर अगाडि बढ्नका लागि आग्रह गरेका थिए ।
