एकीकृत समाजवादीले सचिवालय बैठक बोलाएको छ । आगामी शुक्रबार बस्ने गरी सचिवालय बैठक बोलाइएको हो । सचिवालयपछि स्थायी कमिटी, पोलिटब्युरो र केन्द्रीय समिति बैठक बोलाउने एकीकृत समाजवादीको तयारी छ ।
सचिवालय बैठकले मुख्यत: स्थायी समिति, पोलिटब्युरो र केन्द्रीय समिति बैठकको मिति तय गर्ने उपाध्यक्ष एवं प्रवक्ता प्रकाश ज्वालाले जानकारी दिए । बैठकमा जेन–जी आन्दोलनपछिको विकसित राजनीतिक घटनाक्रम, वाम–समाजवादी पार्टीहरूको सहकार्य र एकता, आगामी निर्वाचनलगायत विषयमा छलफल हुनेछ ।
एकीकृत समाजवादीको अघिल्लो सचिवालय बैठकले पार्टी एकताका लागि वार्ता गर्न वरिष्ठ नेता बेदुराम भुसालको नेतृत्वमा अर्का वरिष्ठ नेता प्रमेश हमाल र उपाध्यक्ष ज्वाला रहेको कार्यदल गठन गरेको थियो । बैठकमा कार्यदलले हालसम्म गरेका कामबारे पनि छलफल हुने नेताहरूले बताएका छन् ।
कार्यदलले विभिन्न चरणमा छलफल गरिरहेको छ । सोमबार मात्रै माओवादीको सचिवालय बैठकमा अध्यक्ष पुष्पकमल दाहाल प्रचण्डले एकीकृत समाजवादीसहित समाजवादी मोर्चाका दलहरूबिच केही दिनमै एकताको टुंगो लाग्ने बताएका थिए ।
माधवकुमार नेपाल नेतृत्वको एकीकृत समाजवादी र महिन्द्र राय यादव नेतृत्वको नेसपासँग करिब–करिब कुरा टुंगिएको प्रचण्डको ब्रिफिङ थियो । एकीकृत समाजवादीले गत भदौ अन्तिम साता स्थायी समिति, पोलिटब्युरो र केन्द्रीय समिति बैठक बोलाएको थियो । तर, आन्दोलनका कारण ती बैठक स्थगित भएको थियो ।
