नेपालका आशिष भारतीले पहिलोपटक अन्तर्राष्ट्रिय मोटर स्पोर्टस्को अफिसियल इभेन्टमा स्वर्ण पदक जितेका छन् । श्रीलंकाको कोलम्बोमा कार्टिङ सर्किटमा भएको प्रतिस्पर्धाअन्तर्गत एसिया प्यासिफिक मोटर स्पोर्टस् च्याम्पियनसिप २०२५ मा ऐतिहासिक प्रदर्शन गरी भारतीले नेपाललाई स्वर्ण दिलाएका हुन् ।
नेपालले अन्तर्राष्ट्रिय मोटर स्पोर्टस्मा च्याम्पियनसिप उपाधि जितेको यो नै पहिलोपटक हो ।
प्रतिस्पर्धामा १८ राष्ट्रका दुई सय चार खेलाडीबिच भएको प्रतिस्पर्धामा भारतीले अटो जिमखाना (पुरुष एकल) विधामा शीर्ष स्थानमाथि कब्जा जमाए । ललितपुरका ३१ वर्षीय आशिष पहिलो दिनको अभ्यासमा १६औँ स्थानमा सीमित भएका थिए । तर, दोस्रो दिन भएको अर्को इभेन्ट एसिया अटो जिमखाना च्याम्पियनसिपमा उनी पाँचौँ स्थानमा रहे । त्यसपछि आत्मविश्वाससहित भारती मुख्य प्रतियोगितामा प्रवेश गरेका थिए । अन्तिम दिनको मुख्य प्रतिस्पर्धाको छनोट चरणमा उनी दोस्रो स्थानमा रहेका थिए ।
शीर्ष आठबिचको फाइनलमा उनले सबै प्रतिस्पर्धीलाई पछि पार्दै स्वर्ण जित्न सफल भए । नेपाल अटोमोबाइल्स एसोसिएसन (नासा नेपाल) मार्सल एन्ड ट्रेनिङ कमिसनका सचिव तथा च्याम्पियनसिपका नेपाली टिम म्यानेजर आशिष रौनियारले सबैको मिहिनेतले नेपाली खेलाडीले श्रीलंकामा ऐतिहासिक प्रदर्शन गरेको बताए । ‘समग्रमा यो उपलब्धि साझा मिहिनेतको परिणाम हो,’ रौनियारले भने ।
नेपाललाई स्वर्ण दिलाएका भारतीले सामूहिक संघर्षको परिणामका रूपमा बताए । ‘यो जित मेरो मात्र होइन, सम्पूर्ण टिम र नेपाली मोटर स्पोर्टस्को सामूहिक संघर्षको परिणाम हो,’ उनले भने, ‘म एक दशकभन्दा बढी समयदेखि यसकै लागि मिहिनेत गरिरहेको थिएँ, अब नेपालमा मोटर स्पोर्टस्लाई अझै व्यवस्थित र व्यावसायिक बनाउनुपर्ने वेला आएको छ ।’ भारतीले नेपाली मोटर स्पोर्टस् खेल्न र हेर्न मात्र नभएर जित्नका लागि सन्देश दिएको बताए ।
नेपाल, अस्ट्रेलिया र जापान सातौँ स्थानमा
च्याम्पियनसिपमा नेपालले अस्ट्रेलिया र जापानसँगै समान एक स्वर्ण जित्दै सातौँ स्थान संयुक्त रूपमा बाँडेको छ । पदक तालिकामा फिलिपिन्स शीर्ष स्थानमा छ । फिलिपिन्सले समान दुई स्वर्ण, रजत र कांस्य जितेको थियो । आयोजक श्रीलंका र हङकङले पनि दुई–दुई स्वर्ण हात पारे । तर, रजत तथा कांस्य पदक बढी जितेको श्रीलंका दोस्रो र हङकङ तेस्रो स्थानमा रहेको छ । मलेसिया, भारत र किर्गिस्तानले एक स्वर्ण जिते । मलेसियन चौथो, भारत पाँचौँ र किर्गिस्तान छैटौँ रहेका छन् । चाइनिज ताइपेई, पाकिस्तान, उज्वेकिस्तान र दक्षिण कोरिया रजत र कांस्यमै सीमित भए । चीन, सिंगापुर, माल्दिभ्स र बंगलादेश पदकविहीन भए ।
नेपालबाट ६ खेलाडी सहभागी
नेपालबाट अटो जिमखानामा तीन, क्रसकार–अटोक्रसमा दुई र ई–स्पोर्टस्मा एक गरी कुल ६ खेलाडीले प्रतिस्पर्धा गरेका थिए । नेपालबाट सहभागीमध्ये भारतीले उत्कृष्ट प्रदर्शन गर्दै स्वर्ण जित्न सफल भए । अरू खेलाडीले पनि आफ्नो पहिलो अन्तर्राष्ट्रिय प्रतियोगितामा पदक हात नपारे पनि दमदार प्रदर्शन गर्न सफल भएको टिम म्यानेजर रौनियारले बताए । मोटरसाइकल रेसिङका राष्ट्रिय च्याम्पियन राजकुमार कार्कीले पहिलोपटक चारपांग्रे प्रतिस्पर्धामा अन्तर्राष्ट्रिय डेब्यु गरे । उनी शीर्ष १६ खेलाडीभित्र छनोट भएनन् । महिला अटो जिमखाना एकलमा बिपास्ना तामाङ दसौँ स्थानमा परिन् । उनको पहिलो अन्तर्राष्ट्रिय सहभागिता नै नेपालमा महिला मोटर स्पोर्टस्का लागि प्रेरणा बन्यो ।
जयप्रताप मास्के र रविन सुनवारले क्रसकार–अटोक्रस पहिलो अन्तर्राष्ट्रिय अनुभव लिए । मास्के र सुनवारले व्यावसायिक ¥याली चालकहरूसँग प्रतिस्पर्धा गर्दै सन्तोषजनक प्रदर्शन गरेका छन् । अन्तर्राष्ट्रिय क्रसकार विधामा पहिलो नेपाली सहभागिता रहेकोमा जय सेमिफाइनल चरणसम्म पुगेका थिए । उनले आफ्नो विधामा १२औँ स्थान रक्षा गरेका थिए । रविनको पनि पहिलो अन्तर्राष्ट्रिय अनुभव राम्रो रह्यो । प्रतियोगिताका अर्का नेपाली सहभागी रोशन अधिकारीले ई–स्पोर्टस्मा नेपालको प्रतिनिधित्व गरेका थिए ।
रोजगारीको सिलसिलामा अस्ट्रेलियामा रहेका उनी उतैबाट श्रीलंकामा प्रतिस्पर्धा गर्न पुगेका थिए । मोटर स्पोर्टस्भित्रको सिम–रेसिङ लोकप्रिय र सहज विधा रहेको उनले बताएका छन् । प्रत्येक दुई–दुई वर्षमा एसिया प्यासिफिक क्षेत्रका राष्ट्रबिच हुने एसिया प्यासिफिक मोटर स्पोर्टस् च्याम्पियनसिपको यस दोस्रो संस्मरणमा कार्टिङ स्प्रिन्ट, कार्टिङ एन्डुरेन्स, कार्टिङ स्लालम, अटो जिमखाना, क्रस–कार अटोक्स र ई–स्पोर्टस् गरी ६ विधासँगै थप १२ विधागत वर्गमा प्रतिस्पर्धा भएको थियो ।
१६ वर्षदेखि अन्तर्राष्ट्रिय मञ्चमा नासा
सन् २००८ मा नेपाल अटोमोबाइल्स एसोसिएसन (नासा नेपाल) स्थापना भएको थियो । मोटर स्पोर्टस् विश्वकै सबैभन्दा लोकप्रिय र व्यावसायिक खेलमध्ये एक मानिन्छ । अन्तर्राष्ट्रिय अटोमोबाइल महासंघ (एफआइए) र अन्तर्राष्ट्रिय मोटरसाइकल महासंघ (एफआइएम)अन्तर्गत हुने यस किसिमको खेलमा नेपालले १६ वर्षअघि मात्रै संस्थागत रूपमा प्रवेश गरेको टिम म्यानेजर रौनियारले बताए । ‘नासा स्थापना भएपछि विभिन्न राष्ट्रिय प्रतियोगिता, तालिम, पूर्वाधार विकास र युवा आकर्षणका कार्यक्रममार्फत मोटर स्पोर्टस्मा सहभागिता जनाइरहेको छ,’ उनले भने, ‘निरन्तर प्रयासपछि नेपालमा अत्याधुनिक मोटर स्पोर्टस् ट्र्याक वा विश्वस्तरको सुविधा नभएको अवस्थामा ऐतिहासिक सफलता प्राप्त गर्न सफल भयौँ ।’ मोटर स्पोर्टस्को माध्यमबाट साहसिक पर्यटनसँग जोड्न सकेमा खेलाडीलगायत देशकै पहिचान र पर्यटन उद्यमलाई नयाँ उचाइमा पु¥याउन सक्ने उनले बताए ।
