मध्यरौतहटलाई कलैया हुँदै वीरगंजसित जोड्ने मुख्य सडकलाई बाढीले भत्काएको छ। रौतहटको मौलापुर नगरपालिका अन्तर्गत सोनरनियामा बाढीले सडकलाई भत्काएर पानी बग्न थालेपछि यातायात अवरुद्ध भएको हो।
गत शुक्रबार रातिदेखि आइतबार बिहानसम्म परेको अविरल वर्षाले जयनगर–वीरगंज सडकको रौतहट खण्डमा दर्जनौँ ठाउँमा नाघेर बाढीको पानी बगेको थियो। आइतबार दिनभर बाढीले दर्जनौँ ठाउँ अवरुद्ध पारेको भए पनि तीव्र गतिको बाढीले सोनरनियाँमा सडक भत्काएर बगाएको हो।
सोनरनियामा सडक भत्काएपछि वैकल्पिक मार्ग अपनाउन स्थानीयले आग्रह गरेका छन्। सोनरनिया मूल चौकदेखि सगैया पिपरिया हुँदै हुलाकी राजमार्गमा पुग्न सकिने बताइएको छ। सडक अवरुद्ध भएको ठाउँमा दुवैतिर यात्रुहरूलाई स्थानीयले बाटो देखाउने काममा सहयोग गरिरहेका छन्।
गए रातिदेखि मध्यरौतहटसम्म बाढीको प्रकोप कम हुँदै गएको भए पनि सदरमुकाम र दक्षिणी रौतहटमा भने बाढीले विकराल रूप लिएको छ। दर्जनौँ गाउँ अझै पनि डुबानमा छन्। पानी बिस्तारै कम हुने आशा रहे पनि रौतहटको धेरै ठाउँमा सडक र बाँधलाई बाढीले भत्काएको देखिएको छ।
बकैया नदीको तटबन्धलाई ठाउँ ठाउँमा भत्काउँदा धेरै क्षति भएको छ। सबैभन्दा बढी क्षति धानबालीलाई भएको छ। गत वर्षको भन्दा निकै ठुलो वर्षा र बाढी आएकोले धानखेतीलाई सबैभन्दा ठुलो क्षति भएको हो। सबैतिरबाट सूचना प्रसार हुँदा धेरै सावधानी र सतर्कता अपनाउनाले खासै जनमालको क्षति हुन नपाएको बताइएको छ।
धानबालीलाई अकल्पनीय क्षति पुगेकोले सरकारले धान किसानलाई विशेष राहत दिनुपर्ने माग उठ्न थालेको छ।
