अविरल वर्षासँगैको मौसमजन्य विपत्तिका कारण अलपत्र परेका र बेखर्ची भएका पर्यटकलाई पोखरामा निःशुल्क खाना र बासको व्यवस्था गरिएको छ। अन्य पर्यटकलाई होटेलको प्रचलित दररेटमा २५ प्रतिशत छुट दिइने भएको छ।
होटेल संघ पोखराका अध्यक्ष लक्ष्मण सुवेदीले आइतबार एक प्रेस विज्ञप्ति जारी गर्दै बाढी, पहिरो र मौसमजन्य विपत्ति तथा कठिनाइका कारण कोही पर्यटक अलपत्र परेको र बेखर्ची भएको भए होटेल संघ पोखरा नेपालले निःशुल्क खाना, बस्नको व्यवस्था गरेको जनाएका छन्।
राहत र छुट अलपत्र परेका र बेखर्ची भएका पर्यटकका हकमा मात्र लागू हुने बताइएको छ।
‘…पोखरा र वरपरको क्षेत्रको भ्रमणका क्रममा बाढी, पहिरो र मौसमजन्य विपत्ति तथा कठिनाइका कारण कोही पर्यटक अलपत्र परेको र बेखर्ची भएको भए होटेल संघ पोखरा नेपालले निःशुल्क खाना र बस्नको व्यवस्था गरेको सम्बन्धित सबैका लागि अवगत गराउन चाहन्छौँ,’ विज्ञप्तिमा भनिएको छ।
