पोखरा। जल तथा मौसम विज्ञान विभागले आजदेखि असोज २० गतेसम्म पोखरासहित देशभर भारी वर्षाको प्रक्षेपण गरेसँगै पोखरा महानगरपालिकाले सम्पूर्ण नगरवासीलाई उच्च सतर्कता र पूर्व तयारीमा जुट्न हार्दिक अपिल गरेको छ।पोखरा महानगरपालिकाका मेयर धनराज आचार्यले सम्भावित विपद् जोखिम न्यूनीकरणका लागि पूर्व सचेतना, सतर्कता र सावधानी नै सबैभन्दा महत्वपूर्ण हुनेमा जोड दिनुभएको छ।
पोखरा प्राकृतिक रूपमै मुलुकका अन्य स्थानभन्दा बढी पानी पर्ने क्षेत्र भए पनि आगामी चार दिन थप सावधानी अपनाउनु अपरिहार्य रहेको महानगरको भनाइ छ। भारी वर्षाका कारण हुनसक्ने सम्भावित क्षतिलाई कम गर्न पूर्व तयारीमा जुट्न मेयर आचार्यले अनुरोध गर्नुभएको छ।
जोखिमयुक्त क्षेत्रमा विशेष सचेत रहन आग्रह गर्दै महानगरले नदीकिनारका बस्तीहरू, डुबान प्रभावित क्षेत्रका बासिन्दाहरू, खहरे खोलाको छेउ र खोँचमा बसोबास गर्ने नगरवासीहरूलाई विशेष ध्यान दिन भनेको छ।
नगरवासीलाई आफ्नो बसोबास रहेको स्थान वरपरको जमिनको अवस्था नियमित निरीक्षण गर्न, चर्किएको वा च्यातिएको पाइएमा पानी नपस्ने गरी प्लास्टिक वा अन्य वस्तुले ढाकछोप गर्न आग्रह गरिएको छ।
“विपद् कुनै पनि बेला आउन सक्छ। नगरवासीहरूको जिउधनको सुरक्षाका लागि महानगरपालिका पूर्ण प्रतिबद्ध छ,” मेयर आचार्यले भन्नुभयो।
महानगरपालिकाले विपद्को बेला राहत, उद्धार र उपचारका लागि मातहतका संयन्त्रहरूको प्रभावकारी परिचालन गरिने जानकारी दिएको छ। कुनै पनि समस्या परेमा वा विपद्जन्य घटनाहरूको सूचना दिनका लागि तत्कालै निम्न नम्बरहरूमा सम्पर्क गर्न सकिनेछ:
महानगरपालिकाको विपद् शाखा: ०६१-५८३३१३
नगर प्रहरी प्रमुख: ९८४६०४०७५१ वा ९८४६०२१०३०
मेयर आचार्यले समयमा सूचना सम्बन्धित निकाय समक्ष पुर्याउन सकिएमा त्यसको जोखिम र प्रभावलाई न्यूनीकरण गर्न सहज हुने भन्दै मौसमको प्रक्षेपण अनुसार स्थानीय प्रशासनले गरेको अनुरोधलाई पूर्ण पालना गर्न गराउन सबै नगरवासीमा हार्दिक अनुरोध गर्नुभएको छ।
