महोत्तरी सदरमुकाम जलेश्वरमा भएको रावण दहनको क्रममा रावणमा लागेको बम पड्केर पाँचजना घाइते भएका छन् । घाइते हुनेहरुमा जलेश्वर नगरपालिका ८ बस्ने अन्दाजी वर्ष ४३ का पवन पाठक,जलेश्वर कै वड़ा नं ४ मसूरपट्टी बस्ने वर्ष ९ का आनन्द पाठक,जलेश्वर ३ खैरा बस्ने वर्ष १४ का आलम राइन,जलेश्वर २ बस्ने वर्ष २० का सुरज भण्डारी र वड़ा नं १ बस्ने वर्ष २२ का मनीष चौधरी छन् । घाइतेहरूको टाउको,आँखा र गालामा काटिएको हो ।
प्रादेशिक अस्पतालमा उपचारपछि अधिकांश घाइते घर फर्के पनि ९ वर्षीय आनन्द पाठकको आँखा मुनि गम्भीर चोट रहेकोमा उनलाइ आँखा विशेषज्ञसँग थप उपचार गराउन जनकपुर रिफर गरिएको छ ।
दुर्गा पूजा समिति शंकर चौकका अनुसार पछिल्ला केहि वर्षदेखी रावण दहन गर्दै आएकोमा यस पटक थप दुई गरि तीन पुतला दहन गरेको हो । रावणको पुतला नजिक भएर उनीहरु त्यसबाट निस्केको कुनै कड़ा वस्तुले लागेर उनीहरु घाइते भएको हुन सक्ने प्रहरीको प्रारम्भिक जानकारी छ ।
