पोखरा महानगरपालिकाका मेयर धनराज आचार्यले सडक किनारमा आन्दोलनका क्रममा आगजनी भई अलपत्र परेका सवारी साधन तथा अन्य सामग्री हटाउन सहयोगका लागि सर्वसाधारणलाई आग्रह गर्नुभएको छ। यस्ता अलपत्र वस्तुहरूले विदेशी पर्यटकहरूमा समेत नकारात्मक प्रभाव परिरहेको भन्दै मेयर आचार्यले सामाजिक सञ्जालमार्फत यस्तो अनुरोध गर्नुभएको हो।
मेयर आचार्यले जारी गर्नुभएको सूचनामा भनिएको छ, “आन्दोलनका क्रममा आगजनीमा परेका सवारी साधनहरू आजसम्म पनि सम्बन्धित कार्यालय वा व्यक्तिले सार्वजनिक स्थलबाट नउठाउँदा, विदेशी पर्यटकहरूमा समेत नकारात्मक प्रभाव र शंका उत्पन्न भइरहेको छ।”
महानगरपालिकाले यस्ता सवारी साधनहरूलाई सुरक्षित रूपमा व्यवस्थापन गर्ने कार्य गरिरहेको जानकारी दिँदै मेयर आचार्यले नागरिकहरूलाई सक्रिय सहभागिताका लागि आह्वान गर्नुभएको छ। “यस कारण, जुनसुकै कार्यालय वा व्यक्तिको भए पनि ती सवारी साधनहरू महानगरपालिकाले उठाई सुरक्षित रूपमा व्यवस्थापन गरिरहेको छ,” उहाँले भन्नुभएको छ।
यदि तपाईंको वरिपरि सडकको दायाँ–बायाँ आगलागीमा परेका सवारी साधन वा अन्य कुनै सामग्री अलपत्र परेको देखिएमा तुरुन्तै महानगरपालिकालाई ९८४६०३१४६५ नम्बरमा फोन गरेर जानकारी गराउन मेयर आचार्यले अनुरोध गर्नुभएको छ। उहाँको यस आग्रहले पोखराको सौन्दर्य र पर्यटकीय वातावरणलाई थप स्वच्छ र आकर्षक बनाउन मद्दत पुग्ने विश्वास गरिएको छ।
पोखरालाई सुन्दर र व्यवस्थित राख्नका लागि महानगरपालिकाले गरिरहेको यस प्रयासमा सबैको साथ र सहयोग अपरिहार्य रहेको मेयर आचार्यले उल्लेख गर्नुभएको छ।
