काठमाडौं उपत्यकाका पर्व लक्षीत बिशेष सुरक्षा योजना लागु भएकै दिन दुई सुरक्षाकर्मीमाथि सांघातिक हमला भएको छ । हमलामा भक्तपुरस्थित प्रहरी प्रभाव कटुन्जेका असई राजन बनमाला र प्रहरी जवान राजबहादुर ऐर परेका हुन् ।
जिल्ला प्रहरी परिसर भक्तपुरका अनुसार उनीहरूमाथि गत ६ असोजमा हमला भएको हो । घटनामा सई बनमालाको हात र ढाडमा गम्भीर चोट लागेको छ भने प्रहरी जवान ऐनको टाउको र हातमा चोट लागेको छ । उनीहरूको अहिले महाराजगन्जस्थित प्रहरी अस्पतालमा उपचार भइरहेको छ ।
जिल्ला प्रहरी परिसर भक्तपुरको प्रवक्ता डिएसपी ढुण्डिराज न्यौपानेले दुई सुरक्षाकर्मी माथि सांघातिक हमला भएको र उनीहरुको अहिले प्रहरी अस्पतालमा उपचार भईरहेको बताए ।
उनले भने, ‘गत ६ असोजमा दुई सुरक्षाकर्मी माथि आक्रमण भयो । उनीहरु घाइते भएका छन् । उनीहरुको अहिले महाराजगन्जस्थित प्रहरी आस्पतालमा उपचार भइरहेको छ । घटना सम्बन्धमा अनुसन्धान भइरहेको छ ।’
प्रहरीका अनुसार घटनामा संलग्न मध्ये तीन जना पक्राउ परेका छन् । पक्राउ पर्ने धादिङका अरुण बिक, बलराम बिक र कुमार बिक रहेका छन् । उनीहरुले भक्तपुर सूर्यबिनायक नपा–४ स्थित हिमाल फार्मेसीमा सुरक्षाकर्मी माथि आक्रमण गरेका थिए । घटनामा अन्य चार जना पनि संलग्न थिए । उनीहरु भने अहिले फरार छन् ।
प्रहरीका अनुसार गत ६ असोजको बेलुका ९ बजे औषधि खरिद गर्ने क्रममा फार्मेसीमा झगडा भएको थियो । औषधि पसलेले घटना सम्बन्धमा प्रहरीलाई खबर गरेका थिए । त्यस लगतै सई बममालाको कमाण्ड सुरक्षाकर्मी घटना स्थल पुगेका थिए । पक्राउ गर्ने क्रममा घटनामा संलग्न हुनेहरुले प्रहरीलाई हमला गरेका थिए ।
भक्तपुर परिसरका प्रवक्ता डिएसपी न्यौपानेले भने, औषधि पसलमा लफडा भएपछि प्रहरी घटनास्थल पुग्यो । पक्राउ गर्ने क्रममा घटनामा संलग्न हुनेहरुले प्रहरीलाई आक्रमण गरे । र, फरार भए । खोजी गर्ने क्रममा तीन जना पक्राउ परेका छन् । अन्य फरार छन् । उनीहरुको खोजी भइरहेको छ ।’
