रुसको पश्चिमी लेनिनग्राद क्षेत्रको स्लान्त्सी जिल्लामा यस महिनाभरि विषाक्त मदिरा सेवनका कारण कम्तीमा १९ जनाको मृत्यु भएको छ।
क्षेत्रीय सरकारको प्रेस विज्ञप्तिमा उल्लेख भएअनुसार तीमध्ये ८ जनाको मृत्यु प्रयोगशालामा पुष्टि भएको ‘मिथेनोल विषाक्तता’ का कारण भएको देखिएको छ।
यस घटनामा संलग्न भएको आशंकामा एक पुरुष र एक महिलालाई प्रहरीले पक्राउ गरेको छ र मुद्दा दर्ता गरी आवश्यक कानुनी अनुसन्धान अघि बढाइएको छ।
रुसमा सस्तो मूल्यमा पाइने घरेलु र अस्वीकृत मदिरा सेवनका कारण यस्ता घटना समय-समयमा दोहोरिन्छन्। विशेष गरी ग्रामीण र आर्थिक रूपमा कमजोर क्षेत्रमा कानुनी मदिरा किन्न नसक्ने कारणले मानिसहरू यस्ता पदार्थ सेवन गर्न बाध्य हुन्छन्।
यसअघि सन् २०२३ मा नक्कली साइडर सेवनबाट ५० जनाको मृत्यु भएको थियो भने, सन् २०१६ मा साइबेरियाको इरकुत्स्कमा मिथेनोल मिसिएको ‘बाथ ऑयल’ सेवनबाट ६० भन्दा बढी व्यक्तिले ज्यान गुमाएका थिए।
यस्ता घटनालाई ध्यानमा राख्दै सरकारले सम्बन्धित कानुन कडा पारे पनि विषाक्त र अवैध मदिराको पहुँच पूर्ण रूपमा नियन्त्रणमा आउन सकेको छैन, जुन सार्वजनिक स्वास्थ्यका लागि चिन्ताको विषय बनेको छ। एएफपी
