नेपाल कम्युनिस्ट पार्टी (एमाले) पोखरा महानगर कमिटीको १८औँ सचिवालय बैठक शुक्रबार (आज) सम्पन्न भएको छ। कमिटीका अध्यक्ष जीवन प्रसाद आचार्यको अध्यक्षता मा बसेको बैठकले हालै देशव्यापी रूपमा चर्किएको ‘जेनजी आन्दोलन’ को गम्भीर समीक्षा गर्नुका साथै पार्टी सङ्गठनलाई आगामी दिनमा थप बलियो बनाउने महत्त्वपूर्ण निर्णयहरू गरेको छ।
बैठकमा पार्टीका कमरेड कृष्ण थापा को प्रमुख आतिथ्यता रहेको थियो। साथै, प्रदेश कमिटी सचिवालय सदस्य एवं महानगर ईञ्चार्ज कमरेड दिलीप बिक्रम शाही र जिल्ला कमिटीका अध्यक्ष कमरेड बैन बहादुर अधिकारी क्षेत्री को विशेष उपस्थिति रहेको थियो।
बैठकको सुरुमा, आन्दोलनका क्रममा शहीद भएकाहरू प्रति हार्दिक श्रद्धाञ्जलि व्यक्त गर्दै घाइतेहरूको शीघ्र स्वास्थ्य लाभको कामना गरिएको थियो।
आन्दोलनको आडमा भएको सार्वजनिक सम्पत्तिको तोडफोड र आगजनी लाई पार्टीले गम्भीर रूपमा लिएको छ। युवा नेता एवं महानगर कमिटी सचिवले भाद्र २३ र २४ गते पोखरामा भएको घटनाहरूप्रति पार्टीको ध्यानाकर्षण भएको बताउनुभयो। उहाँले आन्दोलनमा घुसपैठ गरी सार्वजनिक सम्पत्तिमा क्षति पुर्याउनु गलत कार्य भएको भन्दै शान्तिपूर्ण प्रदर्शनको मर्म विपरीत भएको अराजकता स्वीकार्य नहुने स्पष्ट पार्नुभयो।
आन्दोलनका कारण पोखराका विभिन्न स्थानमा पुगेको क्षतिको सन्दर्भमा एमाले पोखराले सामाजिक उत्तरदायित्व निर्वाह गर्ने महत्त्वपूर्ण निर्णय गरेको छ। बैठकले आन्दोलनबाट क्षतिग्रस्त भएका पोखराका सबै ठाउँमा गएर पार्टी कमिटीमार्फत सरसफाइ अभियान चलाउने घोषणा गरेको छ। यस अभियानले नागरिकहरूलाई सकारात्मक सन्देश दिनुका साथै क्षतिग्रस्त क्षेत्रको पुनर्निर्माणमा सहयोग पुग्ने विश्वास गरिएको छ।
हालैको घटनाक्रमपछि पार्टी सङ्गठनलाई थप चलायमान बनाउन नेतृत्वले विशेष जोड दिएको छ। पार्टीका सबै वडा कमिटीहरूलाई थप ऊर्जा र नयाँ दृष्टिकोणका साथ अगाडि बढ्ने निर्देशन दिइएको छ।
“जेनजी आन्दोलनले सिर्जना गरेको परिस्थितिबाट पाठ सिक्दै हामी अब पोखराका सबै वडा कमिटीहरूमा गएर पार्टी बारे नयाँ ऊर्जाका साथ बलियो सङ्गठन निर्माण गर्न केन्द्रित हुनेछौँ,” नेतृत्वले जनाएको छ। यसबाट पार्टीले जनतासँगको सम्बन्धलाई अझ प्रगाढ बनाउँदै लैजाने लक्ष्य लिएको छ।
