हालै देशभर चर्किएको ‘जेनजी आन्दोलन’ को क्रममा घुसपेटगरी पोखरा महानगरपालिकाको कार्यालयसहित वडा नं. ७ को कार्यालयमा पनि तोडफोड तथा चोरि बाट ठूलो क्षति पुगेको छ। यस विषम परिस्थितिमा वडाध्यक्ष राम मोहन आचार्य ले आफ्नो वडाका नागरिकलाई तत्काल सेवा प्रवाह गर्न व्यक्तिगत लगानीमा कम्प्युटर लगायतका अत्यावश्यक सामग्रीहरू हस्तान्तरण गर्नुभएको छ।
वडाध्यक्ष आचार्यले रु. १ लाख ५० हजार बराबरको कम्प्युटर लगायतका सामान वडा सचिव लाई हस्तान्तरण गर्दै नागरिकप्रतिको आफ्नो जिम्मेवारी निर्वाह गर्नुभएको छ।
उहाँले यो कदम चाल्नुको कारण स्पष्ट पार्दै भन्नुभयो, “जेनजी आन्दोलनका कारण पोखरा महानगरपालिकाको मुख्य कार्यालय समेत जलेर पूर्ण रूपमा क्षति भएको छ। महानगरपालिकाबाट नयाँ सामग्रीहरू किनेर वडा कार्यालयहरूलाई हस्तान्तरण गर्न समय लाग्ने र लामो प्रशासनिक प्रक्रिया अपनाउनुपर्ने हुन्छ। यसले गर्दा हाम्रा वडावासी नागरिकहरूलाई सेवा पाउन झन् ठूलो सास्ती हुने अवस्था थियो।”
“यस्तो अवस्थामा ढिलासुस्ती गर्नुभन्दा मैले छिटो र सजिलो तरिकाले वडाको काम सुचारु होस् भनेर आफ्नो निजी खर्चमा सामान किनेर दिएको हुँ,” उहाँले थप्नुभयो।
यसअघि कम्प्युटर लगायतका सामग्री सहयोग गर्न विभिन्न गैर-सरकारी संस्था (NGO) तथा INGO हरू आएको तर आफूले सहयोग नलिएको बताउनुभयो। उहाँले भविष्यमा सहयोगको नाममा ती संस्थाहरूले वडाको काममा दबाब दिने वा आफ्नो हितमा काम गर्न लगाउने सम्भावना देखेर कुनै पनि संस्थाले दिएको सामान नलिने अडान लिनुभएको हो।
हस्तान्तरण कार्यक्रमको सुरुमा वडाध्यक्ष आचार्यले आन्दोलनमा शहीद भएकाहरू प्रति श्रद्धाञ्जलि व्यक्त गर्दै घाइतेहरूको शीघ्र स्वास्थ्य लाभको कामना गर्नुभयो। कार्यक्रमको अन्त्यमा उहाँले उपस्थित सबैलाई नजिकिँदै गरेको बडादशैँको शुभकामना समेत दिनुभएको थियो।
वडाध्यक्ष आचार्यको यो कदमले वडावासीलाई तत्काल सेवा प्रवाहमा सहजता ल्याउनुका साथै सार्वजनिक सेवामा पारदर्शिता र स्वायत्तता कायम गर्न प्रेरणा दिएको छ।
