नेकपा (एमाले) पोखरा महानगर कमिटीका सचिव सुशिल बस्नेतले आफूहरूलाई पार्टीको विचार र सिद्धान्तको ‘झोले’ भन्नुमा गर्व लाग्ने बताएका छन्। उनले विदेशी शक्तिको झोले हुनुभन्दा राष्ट्र निर्माणको भिजन बोकेको पार्टीको समर्थक बन्नु गौरवको विषय भएको स्पष्ट पारेका छन्।
युवा नेता बस्नेतले खुलामखुला चुनौती दिँदै भनेका छन्, “हामीले स्वीकार्ने मात्रै होइन, खुलमखुला भनेका छौँ— हामी हाम्रो पार्टी नेकपा (एमाले) को नीति, विचार र सिद्धान्तको झोले हौं। हामी जबज (जनताको बहुदलीय जनवाद) को झोले हौं भनेर गर्वका साथ भनेका छौँ।”
उनले आफ्नो भनाइलाई अगाडि बढाउँदै प्रतिप्रश्न गरे, “तर कोही भन्न सक्छौ यहाँ ट्रम्पका झोले छैनन् भनेर? अनि कोही भन्न सक्छौ मोदीका यहाँ झोले छैनन् भनेर?”
बस्नेतले आफ्नो निष्ठाको औचित्य पुष्टि गर्दै भने, “विदेशीको झोले हुनुभन्दा आफ्नो देश बनाउने भिजन र मिसन बोकेको, राष्ट्र र राष्ट्रियताको पक्षमा सतिसाल झैँ उभिने पार्टीको झोले बन्दा गर्व लाग्छ।”
उनले बुझाईको तह व्यक्तिपिच्छे फरक हुनेतर्फ समेत लक्षित गर्दै टिप्पणी गरे, “जसरी बुझ्नुहोस्, त्यो तपाईंको गिदीमा भर पर्छ, जति छ त्यति नै बुझ्नुहुन्छ।”
