पर्यटन राजधानी पोखराको सबैभन्दा व्यस्त र महत्त्वपूर्ण गन्तव्य लेकसाइडस्थित बाराही चोक मा रहेको भि.एन.वाई. पार्क को दयनीय अवस्थालाई लिएर लामो समयदेखि उठेका गुनासोहरूलाई सम्बोधन गर्दै बाराही टोल विकास संस्थाले सराहनीय पहल गरेको छ। संस्थाको सक्रियतामा आज पार्कमा बृहत् सरसफाइ अभियान सम्पन्न गरिएको छ।
लेकसाइडको मुख्य भागमा अवस्थित यो पार्क विदेशी तथा स्वदेशी पर्यटकका लागि विश्रामस्थल र रमणिय गन्तव्य हुनुपर्ने भए पनि वर्षौँदेखि उचित सरसफाइ र व्यवस्थापनको अभावमा जीर्ण र अलपत्र अवस्थामा थियो। राजनीतिक खिचातानी, मुद्दा र विरोधका कारण यो पार्क उपेक्षाको शिकार बनेको थियो, जसले गर्दा पोखराको पर्यटन छविलाई नै धुमिल बनाइरहेको थियो।
तर, स्थानीय सरकार वा पर्यटन व्यवसायी कसैको पनि ध्यान नपुगेको अवस्थामा बाराही टोल विकास संस्थाले नेतृत्व लिएर यो महत्त्वपूर्ण सामाजिक कामको थालनी गरेको छ। यसले स्थानीय समुदायको जिम्मेवारीबोध र सक्रियता लाई स्पष्ट पारेको छ।
पार्कलाई व्यवस्थित पार्ने यस अभियानमा पोखरा महानगर सरसफाइ शाखाका अधिकृत हर्क गायक, वडा नं. ६ का पूर्व वडा सदस्य हरि पहारी, र सक्रिय युवा अभियन्ता विकास पहारी लगायतका व्यक्तित्वहरूले समेत सक्रिय सहभागिता जनाएका थिए।
बाराही टोल विकास संस्थाको यो सकारात्मक कदमले लेकसाइडका अन्य क्षेत्रहरूलाई पनि सरसफाइ र व्यवस्थापनमा सक्रिय हुन प्रेरित गर्ने विश्वास लिइएको छ। अब स्थानीय सरकारले समेत यस कार्यमा हातेमालो गर्दै पार्कको दीर्घकालीन व्यवस्थापन का लागि योजना बनाउन आवश्यक देखिएको छ।
